ក្រសួងព័ត៌មានណែនាំពីការធ្វើដំណើររបស់អ្នកសារព័ត៌មានក្នុងអំឡុងពេលនៃការបិទខ្ទប់រាជធានីភ្នំពេញ និងក្រុងតាខ្មៅ

ដោយ៖ យូ វីរៈ | ថ្ងៃសុក្រ ទី៣០ ខែមេសា ឆ្នាំ២០២១ |

935

ភ្នំពញ៖ ក្រសួងព័ត៌មាន នៅថ្ងៃទី៣០ ខែមេសា ឆ្នាំ២០២១នេះ បានចេញសេចក្ដីណែនាំមួយស្ដីពីការធ្វើដំណើររបស់អ្នកសារព័ត៌មានក្នុងអំឡុងពេលនៃការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្ដាល។

ក្រសួងព័ត៌មានបានសង្កេតឃើញថា អ្នកសារព័ត៌មានមួយចំនួន បានអនុវត្តត្រឹមត្រូវតាមខ្លឹមសារលិខិតអនុញ្ញាតរបស់ក្រសួង និងវិធានការបិទខ្ទប់ ប៉ុន្តែមាននៅមានអ្នកសារព័ត៌មានមួយចំនួនតូចននៅមិនទាន់យល់ច្បាស់ និងអនុវត្តបានត្រឹមត្រូវ ដូច្នេះក្រសួងព័ត៌មានបានធ្វើការណែនាំដូចខាងក្រោម៖

១- តំបន់ក្រហម៖ ត្រូវបានហាមឃាត់មិនឲ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួនឡើយ រួមទាំងអ្នកសារព័ត៌មានផងដែរ លើកលែងតែអង្គភាពសារព័ត៌មាននោះជាក្រុមការងាររបស់អង្គភាពអនុវត្តវិធានការបិទខ្ទប់របស់ក្រសួងព័ត៌មាន និងអង្គភាពដែលមានលិខិតបង្គាប់ការរបស់ក្រសួងព័ត៌មានទើបអាចធ្វើដំណើរក្នុងតំបន់ក្រហមបាន។

២- តំបន់លឿងទុំ៖ ការធ្វើដំណើររបស់អ្នកសារព័ត៌មានដោយមានភ្ជាប់ជាមួយនូវឯកសារបញ្ជាក់អំពីអត្តសញ្ញា និងការងារ ព្រមទាំងមានលិខិតអនុញ្ញាតសម្រាប់ការធ្វើដំណើរពីក្រសួងព័ត៌មាន និងត្រូវកាត់បន្ថយចំនួនបុគ្គលិកដែលត្រូវធ្វើដំណើរមកត្រឹមកម្រិតអប្បបរមា។ ការធ្វើដំណើរត្រូវគោរពអនុវត្តតាមបម្រាមគោចរ ដោយផ្អាកជាបណ្ដោះអាសន្ននូវរាល់ការធ្វើចរាចរណ៍ និងរាល់សកម្មភាពការងារចន្លោះម៉ោង ៨យប់ ដល់ម៉ោង ៥ព្រឹក លើកលែងតែករណីចាំបាច់ដោយមានការអនុញ្ញាពីអាជ្ញាធរមានសមត្តកិច្ច។

៣- តំបន់លឿង៖ ការធ្វើចរាចរណ៍គ្រប់ប្រភេទត្រូវបានអនុញ្ញាត ប៉ុន្តែត្រូវគោរពតាមវិធានការសុវត្ថិភាពផ្នែកសុខាភិបាល ឲ្យបានម៉ឺងម៉ាត់។ ការធ្វើដំណើរត្រូវគោរពអនុវត្តតាមបម្រាមគោចរ ដោយផ្អាកជាបណ្ដោះអាសន្ននូវរាល់ការធ្វើចរាចរណ៍ និងរាល់សកម្មភាពការងារចន្លោះម៉ោង ៨យប់ ដល់ម៉ោង ៥ព្រឹក លើកលែងតែករណីចាំបាច់ដោយមានការអនុញ្ញាពីអាជ្ញាធរមានសមត្តកិច្ច៕