ម្ចាស់ភោជនីយដ្ឋាន Happy Palace ផ្ដល់ស្បៀងអាហារជូនពលរដ្ឋចំនួន ៤០០គ្រួសារ ដែលកំពុងខ្វះខាតក្នុងអំឡុងនៃវិបត្តិកូវីដ១៩

ដោយ៖ យូ វីរៈ | ថ្ងៃចន្ទ ទី៣ ខែឧសភា ឆ្នាំ២០២១ |

415

ភ្នំពេញ៖ ក្នុងអំឡុង នៃវិបត្តិកូវីដ-១៩ គេឃើញមានសប្បុរសជនជាច្រើន បានបញ្ចេញនូវស្បៀងអាហារទៅតាមលទ្ធភាពរបស់ខ្លួន ផ្ដល់ជូនដល់ប្រជាពលរដ្ឋដែលកំពុងខ្វះខាតស្បៀងពិសេសក្នុងពេលអនុវត្តវិធានការបិទខ្ពប់រាជធានីភ្នំពេញ។

ជាក់ស្ដែង ម្ចាស់ភោជនីយដ្ឋាន «ហេបភី ផាលែស (Happy Palace)» ដែលមានទីតាំងស្ថិតនៅផ្លូវដងផ្លូវ១៩៦៦ ក្នុងសង្កាត់ភ្នំពេញថ្មី ខណ្ឌសែនសុខ នៅថ្ងៃទី០២ ខែឧសភា កន្លងទៅនេះ ក៏បានរៀបចំស្បៀងអាហារ ចំនួន ៤០០កញ្ចប់ ដើម្បីចែកជូនប្រជាពលរដ្ឋខ្វះខាតចំនួន ៤០០គ្រួសារ។

ស្បៀងអាហារដែលម្ចាស់ភោជនីយដ្ឋាន «ហេបភី ផាលែស» រៀបចំនោះ ក្នុងមួយគ្រួសារទទួលបានអង្ករ ១០គីឡូក្រាម មី ១៥កញ្ចប់ ត្រីខ ៤កំប៉ុង និងថ្នាំក្អកមួយដបផងដែរ។

ម្ចាស់ភោជនីយដ្ឋាន «ហេបភី ផាលែស» លោក ប្រាក់ នទី បានប្រាប់ថា ពេលស្រុកទេសសុខសប្បាយ មនុស្សម្នា ក៏មានឱកាសក្នុងការធ្វើអាជីវកម្មកសាងជីវភាពកើតចេញពីបរិយាកាសល្អនៃសង្គមនោះ។ តែពេលស្រុកទេសមានបញ្ហា គ្រោះអាសន្ន គឺទាមទារឱ្យអ្នកមានលទ្ធភាពរួមគ្នាជួយសង្គមវិញ ទៅតាមលទ្ធភាពផងដែរ។ លោកបានបន្តថា ឈរលើទស្សនៈនេះហើយ ដែលនាំឱ្យរូបលោករៀបចំការផ្តល់ស្បៀងអាហារទាំងនេះ ចែកជូនប្រជាពលរដ្ឋខ្វះខាត។ លោកយល់ឃើញថា ស្បៀងទាំងនេះ មិនច្រើន តែបានដោះស្រាយការលំបាករបស់អ្នកខ្វះខាតមួយរយៈខ្លីផងដែរ៕

ប្រភព៖ FreshNews