លោកយាយ អាយុជាង ១០០ឆ្នាំ ពីររូបទៀត បានទទួលអំណោយពីសម្ដេចតេជោ ហ៊ុន សែន

ដោយ៖ យូ វីរៈ | ថ្ងៃសុក្រ ទី១៣ ខែសីហា ឆ្នាំ២០២១ |

356

កំពង់ធំ៖ នៅថ្ងៃទី១៣ ខែសីហា ឆ្នាំ២០២១ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស បានបន្តនាំយកថវិកា និងសម្ភារៈមួយចំនួនទៀត ជាអំណោយរបស់សម្ដេចតេជោ ហ៊ុន សែន ទៅចែកជូនលោកយាយពីររូប មានអាយុជាង ១០០ឆ្នាំ រស់នៅខេត្តកំពង់ធំ ដែលបានស្ម័គ្រចិត្តចាក់វ៉ាក់សាំងបង្ការជំងឺកូវីដ១៩។

លោកយាយពីររូបដែលបានទទួលអំណោយនៅពេលនេះ រួមមាន៖ ទី១ លោកយាយ សែម មាន អាយុ១០២ឆ្នាំ រស់នៅភូមិបឹងប្រា ឃុំឈើទាល ស្រុកសណ្តាន់ ,ទី២ លោកយាយ ស្តើង សុខុម អាយុ ១០២ឆ្នាំ រស់នៅភូមិទំអរ ឃុំទំរីង ស្រុកសណ្តាន់ ខេត្តកំពង់ធំ។

ខណៈធ្វើបទសម្ភាសន៍ជាមួយអ្នកព័ត៌មាន លោកជំទាវ ឱ វណ្ណឌីន បានមានប្រសាសន៍បញ្ជាក់ថា រហូតមកដល់ពេលនេះ លោកយាយ លោកតា មានអាយុចាប់ពី១០០ឆ្នាំឡើង ដែលស្ម័គ្រចិត្តចាក់វ៉ាក់សាំងបង្ការជំងឺកូវីដ១៩ ចំនួន៥៣នាក់ហើយ បានទទួលអំណោយជាថវិកា និងគ្រឿងឧបភោគបរិភោគមួយចំនួនទៀត ជាអំណោយដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ត្រី។

លោកយាយ លោកតា ទាំង ៥៣នាក់នោះរួមមាន៖ ភ្នំពេញ ០៨នាក់, កណ្ដាល ០៣នាក់, ក្រចេះ ០៣នាក់, កំពង់ចាម ០៩នាក់, កំពង់ឆ្នាំង ០១នាក់, កំពង់ធំ ០៨នាក់, កំពត ០១នាក់, តាកែវ ០១នាក់, ត្បូងឃ្មុំ ០៥នាក់, ពោធិ៍សាត់ ០១នាក់, ព្រៃវែង ០២នាក់, ព្រះវិហារ ០៣នាក់, រតនៈគិរី ០៣នាក់, សៀមរាប ០១នាក់, ស្ទឹងត្រែង ០២នាក់, ស្វាយរៀង ០១នាក់ និងខេត្តកោះកុង ០១នាក់៕