ឯកឧត្ដម​ ហ៊ុន​ ម៉ានី និងលោកជំទាវ ព្រមទាំងសប្បុរជន នាំយកអំណោយ​ប្រគល់ជូន​ដល់ស្នងការដ្ឋាននគរបាលរាជធានីភ្នំពេញ​

ឯកឧត្ដម​ ហ៊ុន​ ម៉ានី និងលោកជំទាវ ព្រមទាំងសប្បុរជន នាំយកអំណោយ​ប្រគល់ជូន​ដល់ស្នងការដ្ឋាននគរបាលរាជធានីភ្នំពេញ​

ភ្នំពេញ​៖ នៅព្រឹកថ្ងៃទី០១​ ខែកញ្ញា ឆ្នាំ២០២១ ប្រធានសហភាពសហព័ន្ធយុវជនកម្ពុជា (សសយក) ឯកឧត្ដម​ ហ៊ុន​ ម៉ានី និង​លោក​ជំទាវ ព្រមទាំងសប្បុរសជន បាន​នាំយក​អំណោយប្រគល់ជូន​ដល់ស្នងការដ្ឋាន​នគរបាលរាជធានីភ្នំពេញ​។

ជំនួសមុខឲ្យកងកម្លាំងនគរបាលជាតិ នៃស្នងការរដ្ឋានគរបាលបាលរាជធានីភ្នំពេញ ឯកឧត្តម​ ឧត្តមសេនីយ៍ឯក​ ស​ ថេត​ អគ្គស្នងការរង​ និងជាស្នងការនគរបាលរាជធានីភ្នំពេញ បានសំដែង​នូវសេចក្ដីសោមនស្សរីករាយ ឥតឧបមាចំពោះសន្ដានចិត្តដ៏ថ្លៃថ្លារបស់ ឯកឧត្តម និងលោកជំទាវ ព្រមទាំងសប្បុរសជន ដែលបាននាំយកអំណោយជាច្រើន​ជូន​ដល់ស្នងការដ្ឋាន​នគរបាលរាជធានីភ្នំពេញនៅថ្ងៃនេះ​។

អគ្គស្នងការរងបន្តថា កាយវិការដ៏ឧត្ដុងឧត្ដមនេះ ពិតជាបានឆ្លុះបញ្ចាំង ឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំ ដែលបានឆ្លៀតឱកាសពីការមមាញឹកចូលរួមគៀគរ សប្បុរសជន ជួយបំពេញ ការខ្វះខាត របស់កងកម្លាំងនគរបាលជាតិនៃស្នងការដ្ឋាននគរបាលរាជធានីភ្នំពេញ ឱ្យមានស្មារតី និងឆន្ទៈក្នុងការបំពេញ ភារកិច្ចរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាព សង្គម ជូនប្រជាពលរដ្ឋបន្ថែមទៀត។

ឆ្លៀតក្នុងឱកាសនេះ ឯកឧត្តម​ ស​ ថេត​ ក្នុងនាមកងកម្លាំងនគរបាលជាតិ នៃស្នងការដ្ឋាននគរបាលរាជធានីភ្នំពេញ សូមគោរពជូនពរបវរមហាប្រសើរជូនចំពោះ ឯកឧត្តម និងលោកជំទាវ ព្រមទាំងសប្បុរសជន សូមឱ្យមានសុខភាពល្អ និងសម្រេចបាន ជោគជ័យ គ្រប់ភារកិច្ចដែលរាជរដ្ឋាភិបាលប្រគល់ជូន​ ។

នៅក្នុងពិធីនេះដែរឯកឧត្តម​ ហ៊ុន​ ម៉ានី​ មានប្រសាសន៍ថា កងកម្លាំងនគរបាលជាតិបានបំពេញបេសកកម្មដ៏ថ្លៃថ្លាក្នុងការថែររក្សាសណ្តាប់ធ្នាប់ និងសន្តិសុខសង្គម ហើយសកម្មភាពទាំងនេះ ពិតជាមានតម្លៃណាស់សម្រាប់ភាពសុខសាន្តរបស់យើងទាំងអស់គ្នា។ កងកម្លាំងនគរបាលជាតិរបស់យើង មិនថាក្នុងដំណាក់កាលមុនកូវីដ ១៩ ក្នុងពេលកូវីដ ១៩ ឬតទៅមុខ គឺបានលះបង់កម្លាំងកាយ ពេលវេលាពីគ្រួសារ មិនថាថ្ងៃក្តៅ ភ្លៀង ឬថ្ងៃសម្រាក ហើយមិនថាក្នុងពេលស្ងប់ស្ងៀម ឬពេលចលាចលណាមួយក្នុងការអនុវត្តការងារ ដើម្បីជួយសម្រួលចរាចរណ៍ ថែរក្សាសណ្ដាប់ធ្នាប់ សុខសុវត្ថិភាព សុខដុមរមនា សម្រាប់ប្រជាជនក្នុងរាជធានីភ្នំពេញជាដើម។

ជាមួយគ្នានេះឯកឧត្ដម ក៏បានថ្លែងអំណរគុណ​ និងកោតសរសើរ​ ដល់ការលះបង់ដ៏ធំធេងរបស់កងកម្លាំងនៃស្នងការដ្ឋាននគរបាលរាជធានីភ្នំពេញ​ ក្នុងការការពារសន្តិសុខ​ សណ្តាប់ធ្នាប់​ ជូនប្រជាពលរដ្ឋ​ ជាពិសេសកម្លាំងដែលបានការពារតាមគោលដៅបិទខ្ទប់​ គោលដៅព្យាបាល​ គោលដៅចត្តាឡីស័ក​ ក្នុងដំណាក់កាលនៃការឆ្លងរាលដាលវីរុសកូវីដ១៩។

អំណោយដែលបាននោះយកទៅប្រគល់នៅពេលនេះ រួមមាន​៖ ថវិកាចំនួន ៣,០០០ (បីពាន់) ដុល្លារ, អង្ករចំនួន ១៤.៥ តោន, ត្រីខកំប៉ុងចំនួន ២០០ (ពីររយ) កេស, អាវភ្លៀងចំនួន ១,០០០ (មួយពាន់) អាវ, ភេសជ្ជៈកូកាកូឡាចំនួន ២០០ (ពីររយ) កេស, ទឹកសម្លាប់មេរោគចំនួន ២ (ពីរ) ធុង និងវីតាមីនC ចំនួន ៥ (ប្រាំ) កេស សម្រាប់ប្រើប្រាស់ក្នុងការបង្ការ និងទប់ស្កាត់ការឆ្លងរីករាលដាល នៃជំងឺកូវីដ-១៩ ៕