កម្ពុជាដំឡើងប្រាក់ឈ្នួលអប្បបរមារបស់កម្មករនិយោជិតកាត់ដេរ ដល់១៩៤ដុល្លារ សម្រាប់ឆ្នាំ២០២២ ទោះបីស្ថិតក្នុងវិបត្តិកូវីដ១៩

ដោយ៖ យូ វីរៈ | ថ្ងៃអង្គារ ទី២៨ ខែកញ្ញា ឆ្នាំ២០២១ |

531

ភ្នំពេញ៖ បើទោះបីជាពិភពលោកកំពុងជួបនូវវិបត្តិកូវីដ១៩ ក្ដី កម្ពុជានៅតែយកចិត្តទុកដាក់លើប្រាក់ឈ្នួលរបស់កម្មករនិយោជិតក្នុងវិស័យកាត់ដេរ ដោយនៅថ្ងៃទី២៨កញ្ញានេះ បានកំណត់ដំឡើងប្រាក់ឈ្នួលអប្បបរមាឲ្យដល់ចំនួន ១៩៤ដុល្លារនៅឆ្នាំ២០២២។

សេចក្ដីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា ប្រាក់ឈ្នួលអប្បបរមា ឬប្រាក់ឈ្នួលទាបបំផុតរបស់កម្មករ-កម្មការិនីនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ត្រូវបានសម្រេចដំឡើងដល់ ១៩២ដុល្លារសម្រាប់ឆ្នាំ២០២២ខាងមុខនេះ។

ស្ថិតក្នុងបរិការណ៍នៃការរីករាលដាលជំងឺកូវីដ១៩ ដែលកំពុងជះឥទ្ធិពលអវិជ្ជមានដល់សេដ្ឋកិច្ច និងសង្គម ពិសេសទៅលើបញ្ហាសុខភាព និងជីវភាពរបស់ប្រជាពលរដ្ឋ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចបន្ថែមចំនួន ២ដុល្លារលើទឹកប្រាក់ចំនួន ១៩២ដុល្លារ ដែលធ្វើឲ្យប្រាក់ឈ្នួលសរុបឡើងដល់ ១៩៤ដុល្លារ។

សូមជម្រាបជូនថា ក្នុងកិច្ចប្រជុំស្ដីពីការកំណត់ប្រាក់ឈ្នួលរបស់កម្មករ ក្រុមមេដឹកនាំសហជីពមួយចំនួន បានទាមទារឲ្យដំឡើងប្រាក់ឈ្នួលទាបបំផុតចំនួន ២០៤ដុល្លារ តំណាងភាគីនិយោជករក្សាតួលេខ ១៨៨ដុល្លារ និងតំណាងរាជរដ្ឋាភិបាល ១៩២ដុល្លារ។ កិច្ចប្រជុំបានធ្វើឡើងជាច្រើនលើកតែមិនបានឯកភាពគ្នាលើតួលេខណាមួយឡើយ ដូច្នេះយោងតាមមាត្រា ១២ នៃច្បាប់ស្ដីពីប្រាក់ឈ្នួលអប្បបរមា ក្រុមប្រឹក្សាជាតិប្រាក់ឈ្នួលអប្បបរមា បានអនុវត្តនូវនីតិវិធីបោះឆ្នោតជាសម្ងាត់នាកិច្ចប្រជុំព្រឹកថ្ងៃទី២៨ ខែកញ្ញា ឆ្នាំ២០២១នេះ។ ជាលទ្ធផល តួលេខរបស់តំណាងភាគីរាជរដ្ឋាភិបាល (១៩២ដុល្លារ) បានទទួលសំឡេងគាំទ្រច្រើនជាងគេ គឺ ៤៥សំឡេងលើ ៥១សំឡេង៕