គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

កម្ពុជា-ជប៉ុន ចុះហត្ថលេខាលិខិតប្ដូរសារស្តីពីការផ្តល់ឥណទានសម្បទាន និងហិរញ្ញប្បទាន​ឥតសំណង​របស់ជប៉ុន ចំនួនជាង ៧២លានដុល្លារ

ដោយ៖ យូ វីរៈ​​ | ថ្ងៃចន្ទ ទី១១ ខែតុលា ឆ្នាំ២០២១​ |
កម្ពុជា-ជប៉ុន ចុះហត្ថលេខាលិខិតប្ដូរសារស្តីពីការផ្តល់ឥណទានសម្បទាន និងហិរញ្ញប្បទាន​ឥតសំណង​របស់ជប៉ុន ចំនួនជាង ៧២លានដុល្លារ កម្ពុជា-ជប៉ុន ចុះហត្ថលេខាលិខិតប្ដូរសារស្តីពីការផ្តល់ឥណទានសម្បទាន និងហិរញ្ញប្បទាន​ឥតសំណង​របស់ជប៉ុន ចំនួនជាង ៧២លានដុល្លារ

ភ្នំពេញ៖ ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្ដម មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូត​ជប៉ុន​ប្រចាំ​ព្រះរាជាណាចក្រកម្ពុជា បានចុះហត្ថលេខាលិខិតប្ដូរសារ និងឯកសារពាក់ព័ន្ធ ស្តីពី​ការ​ផ្តល់​ឥណទាន​សម្បទាន និងហិរញ្ញប្បទានឥតសំណងរបស់ជប៉ុន ចំនួនជាង ៧២លានដុល្លារ ដើម្បី​ចូលរួម​ចំណែក​យ៉ាងសំខាន់ដល់ការលើកកម្ពស់ការអភិវឌ្ឍសេដ្ឋកិច្ច-សង្គមនៅកម្ពុជា ក៏ដូចជា​ជួយ​ពង្រឹង​បន្ថែម​ទៀត​នូវទំនាក់ទំនងដ៏ល្អដែលមានស្រាប់ និងចំណងមិត្តភាពរវាងប្រទេសទាំងពីរ។

ពិធីចុះហត្ថលេខាលិខិតប្ដូរសារ និងឯកសារពាក់ព័ន្ធ ស្តីពីការផ្តល់ឥណទានសម្បទាន និងហិរញ្ញប្បទានឥតសំណងរបស់ជប៉ុន បានធ្វើឡើងនៅព្រឹកថ្ងៃទី១១ ខែតុលា ឆ្នាំ ២០២១ នៅទីស្ដីការក្រសួងការបរទេសកម្ពុជា។

រដ្ឋាភិបាលជប៉ុនបានសម្រេចពង្រីកជំនួយអភិវឌ្ឍផ្លូវការ (ODA) ជាឥណទានសម្បទាន ដែលមានទឹកប្រាក់សរុបចំនួន ៦ ៣៣៦ លានយ៉េន ប្រមាណជា ៥៧.៦ លាន ដុល្លារអាមេរិកសម្រាប់ «គម្រោងពង្រីកសមត្ថភាពផ្គត់ផ្គង់ទឹកស្អាតខេត្តសៀមរាប (ដំណាក់កាលទី២)» និងហិរញ្ញប្បទានឥតសំណង ៥គម្រោង ដែលមានទឹកប្រាក់សរុបចំនួន ១ ៦០០ លានយ៉េន ប្រមាណជា ១៤.៥ លានដុល្លារសម្រាប់ «កម្មវិធីអភិវឌ្ឍសេដ្ឋកិច្ច និងសង្គម»

១. ឥណទានសម្បទាន៖ គម្រោង «ពង្រីកសមត្ថភាពផ្គត់ផ្គង់ទឹកស្អាតខេត្តសៀមរាប(ដំណាក់ កាលទី២)» ដែលមានទឹកប្រាក់សរុប ៦.៣៣៦ លានយ៉េន  (ប្រមាណ ៥៨,២១ លានដុល្លារអាមេរិក)។

២. ហិរញ្ញប្បទានឥតសំណង៖

–  គម្រោងគាំទ្រដំណើរការកសាងផែនការបោសសម្អាតមីន និងត្រួតពិនិត្យគុណភាព លើផ្ទៃដីបោសសម្អាត ដែលមានទឹកប្រាក់សរុប ២០០ លានយ៉េន (ប្រមាណ ១,៨ លានដុល្លារអាមេរិក)

–  គម្រោងសម្ភារៈបច្ចេកទេស សម្រាប់មន្ទីរពិសោធន៍ជាតិសំណង់  ដែលមានទឹកប្រាក់សរុប ២៥០ លានយ៉េន (ប្រមាណ ២,២៧ លានដុល្លារអាមេរិក)

–  សម្ភារៈបច្ចេកទេស សម្រាប់ស្ថានីយវាស់វែងអចិន្ត្រៃយ៍ និងមជ្ឈមណ្ឌលទិន្នន័យ ដែលមានទឹកប្រាក់សរុប ២៥០ លានយ៉ន (ប្រមាណ ២,២៧ លានដុល្លារអាមេរិក)

–  គម្រោងបំពាក់ឧបករណ៍សម្ភារៈ និងបរិក្ខារបច្ចេកទេសសម្រាប់គ្រឹះស្ថានអប់រំបណ្តុះ បណ្តាលបច្ចេកទេស និងវិជ្ជាជីវៈ ដែលមានទឹកប្រាក់សរុប ៤០០ លានយ៉េន (ប្រមាណ ៣,៦៣ លានដុល្លារអាមេរិក) និង

–  គម្រោងបំពាក់សម្ភារៈបរិក្ខារ និងគ្រឿងម៉ាស៊ីន ក្នុងវិស័យឧស្សាហកម្មគ្រឿងយន្ត អេឡិចត្រូនិច និងមេកានិក នៅសាកលវិទ្យាល័យភូមិន្ទភ្នំពេញ មានទឹកប្រាក់សរុប ៥០០ លានយ៉េន (ប្រមាណ ៤,៥៤ លានដុល្លារអាមេរិក)។

បញ្ចេញមតិ
ពាក្យគន្លឹះទាក់ទង