សម្តេចតេជោ ហ៊ុន សែន បង្ហាញ​មោទនភាព​ចំពោះ​កុមារដែលចង់រៀនសូត្រ និងបានចាក់វ៉ាក់សាំងរួចរាល់

សម្តេចតេជោ ហ៊ុន សែន បង្ហាញ​មោទនភាព​ចំពោះ​កុមារដែលចង់រៀនសូត្រ និងបានចាក់វ៉ាក់សាំងរួចរាល់

ភ្នំពេញ៖ សម្តេច​តេជោ ហ៊ុន សែន នាយករដ្ឋមន្ត្រី ​ បាន​បង្ហាញមោទនភាពចំពោះកុមារមួយរូបដែលត្រូវបាន​គេបង្ហោះតាមបណ្ដាញសង្គម ជាមួយនឹងឈុតសម្លៀកបំពាក់សិស្ស និងមានខ្ចប់កាតវ៉ាក់សាំងកូវីដ១៩ នឹងថង់ ភ្ជាប់នឹងអាវ ដែលនេះជាការបង្ហាញនូវចិត្តចង់ចូលរៀនសូត្រឡើងវិញ។

តាម​រយៈទំព័រហ្វេសប៊ុកនា​ព្រឹក​ថ្ងៃទី០​២ ខែវិច្ឆិកា ឆ្នាំ​២០២១ សម្ដេចតេជោ ហ៊ុន សែន បាន​សរសេរនៅលើហ្វេសប៊ុកសម្ដេច​យ៉ាង​ដូច្នេះ​ថា «ទោះជារូបភាពមួយសន្លឹកនេះខ្ញុំមិនដឹងថា នៅទីណា?និងចៅតូចនេះឈ្មោះអី អាយុប៉ុន្មាន? តែខ្ញុំពិតជាមានមោទនភាពចំពោះចៅៗដែលចង់រៀនសូត្រ។

ប័ណ្ណចាក់វ៉ាក់សាំងពាក់នៅកបង្ហាញថា ខ្ញុំបានចាក់វ៉ាក់សាំងរួចហើយនិងចូលរៀនដោយគ្មានការភ័យខ្លាចជាមួយ និងការពាក់ម៉ាស់បានត្រឹមត្រូវ។

ទោះចៅមិនមានស្បែកជើងពាក់តែតាជឿថា ចៅច្បាស់ជាលាងដៃនិងរក្សាអនាម័យបានល្អ។

សូមជូនពរចៅៗប្រកបដោយសេចក្តីសុខសេចក្តីចំរើននិងរៀនសូត្របានល្អ។»

សូមបញ្ជាក់ថា កុមារតូចដែលសម្តេចតេជោបានបង្ហោះនេះ មានឈ្មោះ គង់ សីហា អាយុ៧ឆ្នាំ​ រៀននៅសាលាបឋមសិក្សាជ័យ​ និងរស់នៅភូមិត្មាតពង ឃុំរុនតាឯក ស្រុកបន្ទាយស្រី ខេត្តសៀមរាប៕