គ.ជ.ប ប្រកាសបញ្ចប់ការចុះបញ្ជីបេក្ខជនឈរឈ្មោះបោះឆ្នោតក្រុមប្រឹក្សាឃុំ-សង្កាត់ អាណត្តិទី៥ ខណៈការឃោសនានឹងចាប់ផ្ដើមនៅថ្ងៃទី២១ឧសភាខាងមុខ

គ.ជ.ប ប្រកាសបញ្ចប់ការចុះបញ្ជីបេក្ខជនឈរឈ្មោះបោះឆ្នោតក្រុមប្រឹក្សាឃុំ-សង្កាត់ អាណត្តិទី៥ ខណៈការឃោសនានឹងចាប់ផ្ដើមនៅថ្ងៃទី២១ឧសភាខាងមុខ

ភ្នំពេញ៖ គណៈកម្មាធិការជាតិរៀបចំការបោះឆ្នោត (គជប) បានប្រកាស​បញ្ចប់​ការ​ចុះ​បញ្ជី​បេក្ខជន​នៃ​គណបក្យនយោបាយសម្រាប់ឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២។

ផ្អែកលើបញ្ជីបេក្ខជនផ្លូវការគណៈកម្មការឃុំ សង្កាត់រៀបចំការបោះឆ្នោត (គឃ.សប) ១,៦៥២ ឃុំ សង្កាត់ក្នុង ២៥ រាជធានី-ខេត្ត បានធ្វើការចាប់ឆ្នោត ដើម្បីកំណត់លំដាប់លេខរៀងបញ្ជី​បេក្ខជន​ដែលត្រូវដាក់លើសន្លឹកឆ្នោតរួចរាល់អស់ហើយ។ ដូច្នេះការចុះបញ្ជីបេក្ខជន​នៃ​គណបក្សនយោបាយ សម្រាប់ឈរឈ្មោះបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ ត្រូវបានបញ្ចប់ ដោយមានគណបក្សនយោបាយចំនួន ១៧ (ដប់ប្រាំពីរ) បានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលនឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខ តាមឃុំ សង្កាត់ដែលសាមីគណបក្ស នយោបាយបានចុះបញ្ជីបេក្ខជនផ្លូវការ។

សម្រាប់ការឃោសនារកសំឡេងឆ្នោត មានរយៈពេល ១៤ (ដប់បួន)ថ្ងៃ គឺចាប់ផ្តើមពីថ្ងៃទី២១ ខែឧសភា ឆ្នាំ២០២២ ដល់ថ្ងៃទី៣ ខែមិថុនា ឆ្នាំ២០២២។ គ្រប់សកម្មភាពឃោសនាត្រូវបញ្ឈប់ ២៤ (ម្ភៃបួន)ម៉ោង មុនថ្ងៃបោះឆ្នោត។ គណបក្សនយោបាយ និងបេក្ខជននៅក្នុងបញ្ជីបេក្ខជន​នៃគណបក្ស​នយោបាយ នីមួយៗដែលបានចុះបញ្ជីជាផ្លូវការ ត្រូវគោរពច្បាប់ បទបញ្ជា និងនីតិ​វិធី​នៃ​ការបោះឆ្នោត និង ក្រមសីលធម៌ដែលបានកំណត់ដោយ គ.ជ.ប។