គ.ជ.ប បោះពុម្ពសន្លឹកឆ្នោតសរុបជាង ១២លាន៨សែនសន្លឹក ចំណាយទឹកប្រាក់ប្រមាណ ១០ពាន់លានរៀល
ភ្នំពេញ៖ ឯកឧត្ដម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) បានឲ្យដឹងថា សន្លឹកឆ្នោតដែលត្រូវបោះពុម្ពមានចំនួនជាង ១១ លាន ៦ សែនសន្លឹក ហើយសន្លឹកឆ្នោតត្រៀមមានជាង ១ លាន ២ សែន សន្លឹក ដែលត្រូវចំណាយទឹកប្រាក់ប្រមាណ ១០ ពាន់លានរៀល។
ឯកឧត្ដម ហង្ស ពុទ្ធា បានថ្លែងបែបនេះនៅក្នុងពិធីបង្ហាញពីដំណើរការបោះពុម្ពសន្លឹកឆ្នោត សម្រាប់ប្រើប្រាស់ក្នុងការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ នៅរោងពុម្ព ដែលស្ថិតនៅសង្កាត់បឹងកក់ទី១ ខណ្ឌទួលគោក រាជធានីភ្នំពេញ នាព្រឹកថ្ងៃទី០៦ ខែឧសភា ឆ្នាំ២០២២ ។
អ្នកពាក្យ គ.ជ.ប បានឲ្យដឹងទៀតថា នៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នេះ មានគណបក្សនយោបាយចំនួន១៧ បានចូលរួម ហើយក្នុងចំណោមគណបក្សនយោបាយទាំងនោះ មានគណបក្សខ្លះបានដាក់បេក្ខជនឈរឈ្មោះគ្រប់ឃុំ សង្កាត់ ទាំងអស់ទូទាំងប្រទេស តែគណបក្សខ្លះឈរបានត្រឹមតែ ៤ ឃុំ សង្កាត់ប៉ុណ្ណោះ។
បើតាមឯកឧត្ដម ហង្ស ពុទ្ធា បានឱ្យដឹងថា ទម្រង់សន្លឹកឆ្នោតដែលត្រូវបោះពុម្ពនាពេលនេះមានប្រមាណ ១ ៦៥២ ប្រភេទ ហើយទម្រង់សន្លឹកឆ្នោតនេះ គឺផ្អែកទៅតាមលទ្ធផល នៃការចាប់ឆ្នោតលំដាប់លេខ រៀងគណបក្សនយោបាយនៅតាម ឃុំ សង្កាត់ នីមួយៗ ហើយលំដាប់លេខរៀងនេះ គ.ជ.ប យកមកដាក់នៅលើសន្លឹកឆ្នោត ដើម្បីធ្វើការបោះពុម្ព។
ឯកឧត្ដម ហង្ស ពុទ្ធា មានប្រសាសន៍ថា សន្លឹកឆ្នោតដែលត្រូវប្រើប្រាស់នៅក្នុងការបោះឆ្នោតក្រុមប្រឹក្សាឃុំសង្កាត់នេះ មានប្រមាណ ១១ ៦១១ ៤០០ សន្លឹក ហើយសន្លឹកឆ្នោតត្រៀម មានចំនួន ១ ២៣៩ ០០០ សន្លឹក។ សន្លឹកឆ្នោតនេះ ក៏មានដាក់ចំណុចពិសេស ដើម្បីធានាបានថា មិនអាចយកទៅបោះពុម្ពក្លែងក្លាយបានឡើយ។ ឯកឧត្ដមបន្តថា សន្លឹកឆ្នោតនេះ បានចាប់ផ្ដើមដំណើរការបោះពុម្ពតាំងពីថ្ងៃទី០៦ ខែមេសា ឆ្នាំ២០២២ មកម្លេះ ដែលមកដល់ពេលនេះ បានរួចរាល់ចំនួន១៨ ខេត្តហើយ៕ កម្ពុជាថ្មី