អតីតបុគ្គលិកក្រុមហ៊ុន ណាហ្គាវើលដ៍ ៥រូប បន្ថែមទៀត យល់ព្រមទទួល​យក​ប្រាក់​បំណាច់​បញ្ចប់​កិច្ច​សន្យាការងារ

អតីតបុគ្គលិកក្រុមហ៊ុន ណាហ្គាវើលដ៍ ៥រូប បន្ថែមទៀត យល់ព្រមទទួល​យក​ប្រាក់​បំណាច់​បញ្ចប់​កិច្ច​សន្យាការងារ

ភ្នំពេញ៖ អតីតបុគ្គលិកក្រុមហ៊ុនណាហ្គាវើលដ៍ ៥រូប បន្ថែមទៀត ក្នុងចំណោម​អតីត​បុគ្គលិក​ដែល​បាន​គោរពស្នើសុំអន្តរាគមន៍ បានមកទទួលយកដំណោះស្រាយតាមរយៈ​ការធ្វើ​លិខិត​ព្រម​ព្រៀង​ទទួលយកប្រាក់​បំណាច់​បញ្ចប់​​កិច្ច​សន្យាការងារ។ នេះ​បើ​យោង​តាម​សេចក្ដី​ប្រកាស​ព័ត៌មាន​​​របស់​ក្រសួងការងារ និងបណ្ដុះបណ្ដាលវិជ្ជាជីវៈចេញផ្សាយ​នៅថ្ងៃទី២៥ ខែឧសភា ឆ្នាំ២០២២ ។

អនុវត្តតាមគោលការណ៍ណែនាំដ៏ខ្ពង់ខ្ពស់របស់សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មន្ត្រីជំនាញរបស់ក្រសួងការងារ និងបណ្ដុះបណ្ដាលវិជ្ជាជីវៈបានធ្វើការ​ពិនិត្យ​ផ្ទៀងផ្ទាត់ការទូទាត់ប្រាក់បំណាច់បញ្ចប់កិច្ចសន្យាការងារ​ជាមួយតំណាងក្រុមហ៊ុន ហើយពិនិត្យ​ឃើញថា ការទូទាត់ចំនួន ៤ចំណុច គឺបានត្រឹមត្រូវស្របតាមច្បាប់ និងលិខិតបទដ្ឋាន​គតិយុត្តិពាក់ព័ន្ធនឹងការបញ្ឈប់ពីការងាររួម។

ក្រសួងការងារបញ្ជាក់ថា នៅថ្ងៃទី២៥ឧសភានេះ មានអតីតបុគ្គលិកចំនួន៥នាក់បន្ថែមទៀត រួមមាន ១.លោក ផាន់ សុធី ២.លោក សៅ សម្បត្តិ ៣. លោកស្រី អ៊ុក សោភ័ណ ៤.លោក សេង វណ្ណារិទ្ធិ និង៥. លោក​ រស់ សុភ័ក្រ។ បុគ្គលិកទាំង៥រូប បានយល់ព្រមទទួល​យក​ប្រាក់​បំណាច់​បញ្ចប់​កិច្ច​សន្យាការងារ។

សូមបញ្ជាក់ថា គិតមកដល់ថ្ងៃនេះ មានអតីតបុគ្គលិកសរុបចំនួន ១៩២រូបក្នុងចំណោម ៣៧៣រូប ដែលបានទទួលយកនូវប្រាក់បំណាច់បញ្ចប់កិច្ចសន្យាការងារ ដែលធ្វើឲ្យចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម ១៨១រូប៕