NOCC ប្រកាសពីការដង្ហែពានរង្វាន់បាល់ទាត់ពិភពលោក FIFA World Cup Trophy Tour នៅកម្ពុជា

ដោយ៖ យូ វីរៈ | ថ្ងៃសុក្រ ទី២៧ ខែឧសភា ឆ្នាំ២០២២ |

325

គណៈកម្មាធិការជាតិអូឡាំពិកកម្ពុជា (NOCC) បានប្រកាសអំពីការដង្ហែពានរង្វាន់បាល់ទាត់ពិភពលោក FIFA World Cup Trophy Tour មកកាន់ប្រទេសកម្ពុជាជាផ្លូវការហើយ ក្រោយទទួលបានការអនុញ្ញាតពីរាជរដ្ឋាភិបាល។ នេះបើយោងតាមសេចក្ដីប្រកាសព័ត៌មាន របស់គណៈកម្មាធិការជាតិអូឡាំពិកកម្ពុជានៅព្រឹកថ្ងៃទី២៧ ខែឧសភា ឆ្នាំ២០២២។

សេចក្ដីប្រកាសបានបញ្ជាក់ថា ពានរង្វាន់បាល់ទាត់ពិភពលោកនេះនឹងត្រូវដង្ហែមកដល់រាជធានីភ្នំពេញ តាមជើងហោះហើរឯកជនពិសេស “Private jet” នាថ្ងៃទី១៥ ខែមិថុនា ឆ្នាំ២០២២ ខាងមុខ។ តាមរយៈនេះ ក្នុងនាមប្រជាពលរដ្ឋកម្ពុជាទាំងអស់ គណៈកម្មាធិការជាតិអូឡាំពិកកម្ពុជាបានចាត់ទុកនេះ គឺជាមោទនភាពជាតិដ៏វិសេសវិសាល ដែលកម្ពុជាបានទទួលព្រឹត្តិការណ៍នៃដំណើរគោចរពានរង្វាន់បាល់ទាត់ពិភពលោកលើកទី១ ដើម្បីអបអរសាទរការប្រកួតបាល់ទាត់ដណ្ដើមពានរង្វាន់ពិភពលោកនាខែធ្នូ ឆ្នាំ២០២២ ខាងមុខនៅទីក្រុងដូហា ប្រទេសកាតា។ យោងតាមប្រភពដដែលបានបញ្ជាក់ថា កម្មវិធីសំខាន់ៗក្រោយពានរង្វាន់បាល់ទាត់ពិភពលោកមកដល់កម្ពុជា នឹងមានក្បួនដង្ហែពាននេះពីព្រលានយន្ដហោះអន្ដរជាតិភ្នំពេញមកកាន់វិមានសន្ដិភាព ដោយពិធីទទួលស្វាគមន៍ និងលើកពានរង្វាន់ពិភពលោកនេះ នឹងធ្វើឡើងក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។

បន្ទាប់មកនឹងមានការនាំយកពានរង្វាន់បាល់ទាត់ពិភពលោកនេះ ទៅដាក់តាំងនៅពហុកីឡដ្ឋានជាតិមរតកតេជោ កន្លែងដែលកម្ពុជាត្រៀមរៀបចំព្រឹត្តិការណ៍ស៊ីហ្គេមឆ្នាំ២០២៣ ដើម្បីស្វាគមន៍ភ្ញៀវចូលទស្សនា និងថតរូបផ្ទាល់ជាមួយពានរង្វាន់បាល់ទាត់ពិភពលោកនេះចាប់ពីម៉ោង ១រសៀលរហូតដល់ម៉ោង ១០យប់អមជាមួយតន្ដ្រីសម័យកំដរទៀតផង។ តាមរយៈនេះ គណៈកម្មាធិការជាតិអូឡាំពិកកម្ពុជា បានអំពាវនាវឲ្យប្រជាពលរដ្ឋក៏ដូចជាយុវជន-យុវនារី និងអ្នកស្នេហាវិស័យកីឡាបាល់ទាត់ ចូលរួមព្រឹត្តិការណ៍នេះឲ្យបានច្រើនកុះករដើម្បីអបអរសាទរ និងបង្ហាញនូវមោទនភាពជាតិចំពោះព្រឹត្តិការណ៍ជាប្រវត្តិសាស្ដ្រថ្មីមួយទៀត សម្រាប់ប្រទេសកម្ពុជានេះ៕