គ.ជ.ប ប៉ាន់ប្រមាណថាមានពលរដ្ឋជាង ១លាននាក់ដែលនឹងចុះឈ្មោះបោះឆ្នោតនៅខែតុលាខាងមុខនេះ

ដោយ៖ យូ វីរៈ | ថ្ងៃអង្គារ ទី៦ ខែកញ្ញា ឆ្នាំ២០២២ |

258

ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី៦ ខែកញ្ញា ឆ្នាំ២០២២នេះ មានប្រសាសន៍ថា យោងតាមប្រតិទិនស្តីពីការពិនិត្យបញ្ជី និងការចុះឈ្មោះបោះឆ្នោតឆ្នាំ២០២២ សម្រាប់ឈានទៅរកការបោះឆ្នោតជ្រើសតាំងតំណាងរាស្រ្ត នីតិកាលទី៧ គ.ជ.ប បានកំពុងដំណើរការនូវការបណ្តុះបណ្តាលដល់ភាគីពាក់ព័ន្ធ រួមមាន មន្រ្តី តំណាងគណបក្សនយោបាយ អង្គការសង្គមស៊ីវិល សមាគម ដើម្បីចូលរួមអនុវត្ត និងតាមដានការរៀបចំនូវបញ្ជីបោះឆ្នោតផ្លូវការនាខែធ្នូខាងមុខ។

ឯកឧត្តម ហង្ស ពុទ្ធា បានឱ្យដឹងថា តាមការប៉ាន់ប្រមាណ មានប្រជាពលរដ្ឋដែលនឹងចុះឈ្មោះបោះឆ្នោតនៅខែតុលា ខាងមុខនេះ ចំនួនជាង១លាននាក់ សម្រាប់បញ្ជីបោះឆ្នោតឆ្នាំ២០២២។ ឯកឧត្តមបន្តថា តាមការប៉ាន់ស្មានបឋមរបស់ គ.ជ.ប នាខែតុលាខាងមុខ ដែលជាកាលបរិច្ឆេទនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ នឹងកើនឡើងដល់ជាង ១០លាននាក់ បើធៀបនឹងបញ្ជីឈ្មោះបោះឆ្នោតឆ្នាំ២០២១ មានតែជាង ៩លាននាក់។

ជាមួយនឹងការប៉ាន់ស្មានចំនួនកើនឡើងនៃអ្នកចុះបោះឆ្នោតនេះ ឯកឧត្តម ហង្ស ពុទ្ធា បញ្ជាក់ថា ដើម្បីអាចចុះបោះឆ្នោតបាន សូមប្រជាពលរដ្ឋត្រូវត្រៀមនូវឯកសារភ្ជាប់ជាអត្តសញ្ញាណបណ្ណសញ្ជាតិខ្មែរដែលមានសុពលភាពតែមួយគត់ ដើម្បីធានាដល់ការរៀបចំបញ្ជីឈ្មោះផ្លូវការសម្រាប់ការបោះឆ្នោតជ្រើសតាំងតំណាងរាស្រ្តក្នុងឆ្នាំ២០២២។

ចំពោះការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ នឹងមានរយៈពេល៥០ថ្ងៃ គិតចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ឆ្នាំ២០២២ បន្ទាប់មក គ.ជ.ប នឹងដំណើការពិនិត្យនឹងរៀបចំនូវបញ្ជីឈ្មោះបោះឆ្នោតផ្លូវការផងដែរ៕

អត្ថបទទាក់ទង