ដំណាំមៀនកម្ពុជា ត្រូវបានអនុញ្ញាតឱ្យនាំចេញទៅកាន់ប្រទេសចិន

ដំណាំមៀនកម្ពុជា ត្រូវបានអនុញ្ញាតឱ្យនាំចេញទៅកាន់ប្រទេសចិន

អគ្គរដ្ឋបាលគយចិន ទើបបានអនុម័តទទួលស្គាល់ជាផ្លូវការ អនុញ្ញាតឲ្យចំការមៀនចំនួន៧៤ និងរោងចក្រវេចខ្ចប់ចំនួន៨ អាចការកែច្នៃ និង​នាំ​ចេញ​ផ្លែ​មៀន​ស្រស់​ទៅ​កាន់​ប្រទេស​ចិន​បាន​ដោយ​ផ្ទាល់។

ការអនុម័តទទួលស្គាល់ជាផ្លូវការ របស់អគ្គរដ្ឋបាលគយចិន ធ្វើឡើងនៅថ្ងៃទី៧ ខែកញ្ញា ឆ្នាំ២០២២ បន្ទាប់ពីមន្ត្រីជំនាញរបស់ខ្លួន បានដំណើរការត្រួតពិនិត្យចំការមៀន និង​រោង​ចក្រ​ប្រព្រឹត្ត​កម្ម​កម្ចាត់​សមាសភាពចង្រៃលើផ្លែមៀន តាមរយៈប្រព័ន្ធវីឌីអូ នាពេលថ្មីៗនេះ។

យោងតាមបញ្ជីរាយឈ្មោះចម្ការ និងរោងចក្រវេចខ្ចប់ផ្លែឈើក្នុងការនាំចេញទៅកាន់ប្រទេសចិន ដែលចេញផ្សាយដោយរដ្ឋបាលគយប្រទេសចិន បាន​ឱ្យដឹងថា ក្នុង​បញ្ជី​រាយ​ឈ្មោះ​ខាង​លើ​បាន​បន្ថែម ឈ្មោះចម្ការ និង​រោងចក្រ​វេចខ្ចប់​ផ្លែមៀន​កម្ពុជា​ដែល​ត្រូវ​បាន​អនុញ្ញាត​ឱ្យ​នាំ​ចេញ​ទៅ​កាន់​ប្រទេស​ចិន មានន័យថា​ដំណាំមៀន​កម្ពុជា​បាន​បញ្ចប់​នីតិវិធី​ទាំង​ស្រុង​ក្នុង​ការ​នាំ​ចេញ​ទៅ​កាន់​ប្រទេស​ចិន និងអាចនាំចេញទៅទីផ្សារចិនបាន។

រោងចក្រវេចខ្ចប់​ទាំង៨ ដែលទទួលបានការអនុញ្ញាតរួមមាន ១៖ ក្រុមហ៊ុន BAMIN AGRICULTURE HI-TECH DEVELOPMENT CO., LTD, ២៖ ក្រុមហ៊ុន CHINA JINKWOAYUAN IMPORT EXPORT (CAMBODIA) CO., LTD, ៣៖ ក្រុមហ៊ុន TCMC CO., LTD, ៤៖ ក្រុមហ៊ុន CAMBODIAN BANANA AGRICULTURAL CO., LTD, ៥៖ ក្រុមហ៊ុន GAO YUAN (CAMBODIA) DEVELOPMENT CO., LTD, ៦៖ ក្រុមហ៊ុន AL JAZEELAN FOOD PTE. LTD , ៧៖ ក្រុមហ៊ុន JIA DUO BAO BEVERAGE CO., LTD និង៨៖ ក្រុមហ៊ុន JINDIYUAN AGRICULTURAL DEVELOPMENT CO., LTD។

លើកនេះ ចម្ការផ្លែឈើដែល​បាន​ចុះបញ្ជី​ចំនួន​៧៤កន្លែង និងរោងចក្រវេចខ្ចប់ចំនួន៨កន្លែង ត្រូវបានអនុញ្ញាតដោយ​ភាគី​ចិន​ក្នុង​ការ​នាំ​ចេញ​ផ្លែមៀន​ទៅកាន់ប្រទេសចិន។ លើសពីនេះ ចម្ការដំណាំស្វាយចំនួន៧៥កន្លែង និង រោងចក្រ​វេច​ខ្ចប់ដំណាំស្វាយ​ចំនួន ២​កន្លែង​ផ្សេង​ទៀត​ក៏​ត្រូវ​បាន​បន្ថែមផងដែរ។

ចាប់តាំងពីដើមឆ្នាំ២០២២នេះមក ភាគីចិនបានបង្កើតទម្រង់ការងារថ្មី និងបាន​បញ្ចប់​ការ​វាយ​តម្លៃ​ហានិភ័យលើត្រីប្រា ដំណាំពោត និងដំណាំមៀន​នៅ​កម្ពុជា​យ៉ាង​មាន​ប្រសិទ្ធ​ភាព​ដោយ​តាម​រយៈ​វីដេអូ។ រហូតមកដល់បច្ចុប្បន្ននេះ កម្ពុជាមានផ្លែ​ឈើធំ​ៗ​ចំនួន​៣​ប្រភេទ​ដែល​អាច​នាំ​ចេញ​ទៅ​កាន់​ប្រទេសចិនរួមមានដំណាំចេក ស្វាយ និងមៀន។