អ្នកទោសជាប់ឃុំ ១៦០០នាក់ ត្រូវបានជម្លៀសចេញពីពន្ធនាគារខេត្តបន្ទាយមានជ័យ ដោយសារទឹកជំនន់

ដោយ៖ យូ វីរៈ | ថ្ងៃអង្គារ ទី១៣ ខែតុលា ឆ្នាំ២០២០ |

987

បន្ទាយមានជ័យ៖ អ្នកទោសជាប់ឃុំឃាំងប្រមាណ ១,៦០០នាក់ ក្នុងពន្ធនាគារខេត្តបន្ទាយមានជ័យ ត្រូវបានជម្លៀសចេញ បន្ទាប់ពីពន្ធនាគារខេត្តរងការវាយប្រហារដោយទឹកជំនន់។

ឯកឧត្ដម អ៊ុ រាត្រី អភិបាលខេត្តបន្ទាយមានជ័យបានបញ្ជាក់នៅព្រឹកថ្ងៃទី១៣ ខែតុលា ឆ្នាំ២០២០នេះ ថា ដោយសារតែស្ថានភាពលិចលង់ខ្លាំង គណៈគ្រប់គ្រងពន្ធនាគារខេត្ត បានសម្រេចជម្លៀសអ្នកជាប់ឃុំចេញទៅពន្ធនាគារខេត្តផ្សេងដែលនៅក្បែរ ដើម្បីកុំឲ្យមានហានិភ័យអ្វីកើតឡើង។

លោក អ៊ុង ស៊ីផាន ប្រធានពន្ធនាគារខេត្តបន្ទាយមានជ័យ បានឲ្យដឹងដែរថា អ្នកទោសជាប់ឃុំក្នុងពន្ធនាគារនេះមានចំនួន១,៦០០នាក់ ក្នុងនោះស្រី១០០នាក់។ ទឹកបានហូរចូលមកក្នុងពន្ធនាគារខេត្តបន្ទាយមានជ័យ យ៉ាងគំហុកធ្វើឲ្យមានការលិចអគាររដ្ឋបាល និងបន្តហូរចូលទៅក្នុងអគារស្នាក់នៅរបស់អ្នកទោសជាប់ឃុំ។

បើតាមសេចក្ដីរាយការណ៍ ដើម្បីបញ្ជៀសផលប៉ះពាល់ផ្សេងៗ ថ្នាក់ដឹកនាំពន្ធនាគារបានសម្រេចជម្លៀសអ្នកទោសជាប់ឃុំ ចេញបន្ទាន់ ទៅកាន់ពន្ធនាគារ នៃខេត្តមួយចំនួនជាបណ្តោះអាសន្ន។ ជំហានដំបូងនៅព្រឹកថ្ងៃទី១៣ ខែតុលា ឆ្នាំ២០២០នេះ អ្នកទោសជាប់ឃុំចំនួន៨១១នាក់ ស្រី៨៥នាក់ ត្រូវបញ្ជូនចេញទៅកាន់ពន្ធនាគារខេត្តសៀមរាម តាមរថយន្តក្រុង៕