ឯកឧត្តម ហ៊ុន ម៉ានី អញ្ជើញចុះពិនិត្យស្ថានភាពទឹកជំនន់ និងនាំយក​ស្បៀង​ជូន​ដល់​រដ្ឋបាលខេត្ត​កំពង់ស្ពឺ​ ដើម្បីជួយ​ពលរដ្ឋ​រងគ្រោះដោយ​ជំនន់ទឹកភ្លៀង​

ឯកឧត្តម ហ៊ុន ម៉ានី អញ្ជើញចុះពិនិត្យស្ថានភាពទឹកជំនន់ និងនាំយក​ស្បៀង​ជូន​ដល់​រដ្ឋបាលខេត្ត​កំពង់ស្ពឺ​ ដើម្បីជួយ​ពលរដ្ឋ​រងគ្រោះដោយ​ជំនន់ទឹកភ្លៀង​

កំពង់ស្ពឺ៖ នាព្រឹកថ្ងៃទី ១៤ ខែតុលា ឆ្នាំ២០២០ ឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ បានអញ្ជើញចុះពិនិត្យស្ថានភាពជំនន់ទឹកភ្លៀងនៅទំនប់ចាន់ថ្នាល ដែលស្ថិតនៅក្នុងឃុំក្រាំងចេក ស្រុកឧដុង្គ អមដំណើរដោយ ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ មន្ទីរអង្គភាពជំនាញពាក់ព័ន្ធ កម្លាំងប្រដាប់អាវុធទាំងបី និង សសយក ខេត្ត ។

នាក្នុងឱកាសសំណេះសំណាលនោះដែរ ឯកឧត្តម ហ៊ុន ម៉ានី ក៏បានសម្ដែងនូវការសោកស្ដាយចំពោះប្រជាពលរដ្ឋនៅផ្នែកខាងក្រោមដែលទទួលរងផលប៉ះពាល់តិចតួចដោយសារជំនន់ទឹកភ្លៀងបានវាយបំផ្លាញដំណាំស្រូវ និងដំណាំរួមផ្សំមួយចំនួន ។ ឯកឧត្តម ក៏បានអំពាវនាវឲ្យបងប្អូនប្រជាពលរដ្ឋដែលរស់នៅតាមតំបន់នេះត្រូវតែបង្កើនការការប្រុងប្រយ័ត្នខ្ពស់ក្នុងការធ្វើដំណើរលើទំនប់បង្ហៀរទឹកនេះ ជាពិសេសមនុស្សចាស់ជរា និងក្មេងៗ ក៏ដូចជាអាជ្ញាធរមូលដ្ឋានត្រូវប្រចាំការជួយសម្រួលចរាចរណ៍ដល់បងប្អូនប្រជាពលរដ្ឋ និងសង្គ្រោះ ២៤ម៉ោងលើ ២៤ម៉ោងក្នុងករណីមានហេតុការណ៍ណាមួយកើតឡើងជាយថាហេតុ ។

បន្ទាប់ពីចុះពិនិត្យស្ថានភាពទំនប់ទឹកចាន់ថ្នាលរួចមកឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ ក៏បានបន្តដំណើរចុះពិនិត្យស្ថានភាពកម្ពស់ទឹកនៅតាមដងស្ទឹងព្រែកត្នោត និងចូលរួមពិភាក្សាការងារអំពីបញ្ហាប្រព័ន្ធធារាសាស្រ្តជាមួយនឹងរដ្ឋបាលខេត្ត និងស្ដាប់ពីបទបង្ហាញរបស់លោកប្រធានមន្ទីរធនធានទឹក និងឧតុនិយម ដើម្បីរកវិធីសាស្រ្តកាត់បន្ថយបញ្ហាប្រឈមមួយនេះ ឲ្យស្ថិតនៅក្នុងកម្រិតទាបបំផុត ។

ជាមួយគ្នានេះដែរឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ ក៏បាននាំយកនូវទឹកសុទ្ធ ៨០០ កេស-ទឹកក្រូច ១០០ កេស -មី ៣០០កេស -ត្រីខ ៣០០ យូរ -ថ្នាំពេទ្យ (multi vitamin 10 កេស និង Para ចំនួន 10 កេស) -សាប៊ូ ២០០ កេស ប្រគល់ជូនរដ្ឋបាលខេត្តដើម្បីធ្វើការជួយសង្គ្រោះប្រជាពលរដ្ឋ នារដូវរងគ្រោះ ដោយជំនន់ទឹកភ្លៀងនៅតាមក្រុង ស្រុកនានារបស់ខេត្តកំពង់ស្ពឺផងដែរ ៕