កងកម្លាំងសង្គ្រោះរបស់កងពលតូចលេខ៧០ បន្តសកម្មភាពជួយពលរដ្ឋរងគ្រោះដោយទឹកជំនន់ក្នុងខណ្ឌដង្កោ

ដោយ៖ យូ វីរៈ | ថ្ងៃចន្ទ ទី២៦ ខែតុលា ឆ្នាំ២០២០ |

361

ភ្នំពេញ៖ គិតមកដល់ថ្ងៃទី២៦តុលានេះ គឺជាថ្ងៃទី១៣ហើយ ដែលសកម្មភាពរបស់កងកម្លាំងសង្គ្រោះរបស់កងពលតូចលេខ៧០ នៅប្រចាំការ បន្តជួយដឹកជញ្ជូនបងប្អូនប្រជាពលរដ្ឋ និងសម្ភារៈដែលទទួលរងការលិចលង់ដោយទឹកជំនន់ ក្នុងសង្កាត់ស្ពានថ្ម ខណ្ឌដង្កោ។

កងកម្លាំងសង្រ្គោះក៏បានជួយដឹកជញ្ជូនគ្រឿងឧបភោគ បរិភោគរបស់ព្រះសង្ឃនៅវត្តបុទុមវត្តី ដែលលោកបានឧបត្ថម្ភ ជូនប្រជាពលរដ្ឋនៅទីនោះផងដែរ ដើម្បីចូលរួមការងារមនុស្សធម៌ និងចែករំលែក ដល់ប្រជាពលរដ្ឋដែលរងគ្រោះដោយសារជំនន់ទឹកភ្លៀង។

បើតាមព័ត៌មានពីកញ្ញាឧត្តមសេនិយ៍ យុង ខេមរា អនុបញ្ជាការកងពលតូច៧០ ដែលប្រចាំការនៅទីនោះបានបញ្ជាក់ឲ្យដឹងថា ទឹកជំនន់ផ្សារព្រែកជ្រៃ គឺទឹកបានបន្តស្រកអស់ចំនួន២តឹក៥ហ៊ុនហើយ គិតត្រឹមម៉ោង៥ល្ងាចថ្ងៃទី២៦ ខែតុលា ឆ្នាំ២០២០នេះ។

សូមរំលឹកថា ស្ថានភាពទឹកជំនន់នៅផ្សារព្រែក ខណ្ឌដង្កោបានទទួល រងការលិចលង់ដោយអស់រយៈពេល១៣ថ្ងៃ មកហើយ។

សូមបញ្ជាក់ថា ក្នុងសកម្មភាពនៃការជួយពលរដ្ឋរងគ្រោះដោយទឹកជំនន់នេះ បានប្រើប្រាស់មធ្យោបាយក្នុងការដឹកជញ្ជូន មួយចំនួន រួមមាន៖ ប្រើអូប័រចំនួន ១០គ្រឿង និងកម្លាំងទ័ពរបស់កងពលតូចលេខ៧០ ចំនួនប្រមាណ ១០០នាក់ផង៕