សម្ដេចក្រឡាហោម ស ខេង អញ្ជើញចុះចែកពូជស្រូវ និងអំណោយជូនពលរដ្ឋរងគ្រោះដោយទឹកជំនន់ ចំនួន ៣៥០០គ្រួសារ នៅខេត្តព្រៃវែង

ដោយ៖ យូ វីរៈ | ថ្ងៃព្រហស្បតិ៍ ទី១២ ខែវិច្ឆិកា ឆ្នាំ២០២០ |

437

ព្រៃវែង៖ នៅព្រឹកថ្ងៃទី១២ ខែវិច្ឆិកា ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចុះសំណេះសំណាលសាកសួរសុខទុក្ខ ចែកពូជស្រូវ ពូជបន្លែ និងអំណោយមួយចំនួនទៀតជូនប្រជាពលរដ្ឋមានការខ្វះខាតក្នុងជីវភាពក្រោយរងគ្រោះដោយជំនន់ទឹកភ្លៀងចំនួន៣៥០០គ្រួសារ ក្នុងខេត្តព្រៃវែង។

សម្ដេចក្រឡាហោមបានមានប្រសាសន៍ថា ការផ្ដល់ជំនួយពិសេសពូជស្រូវ ពូជបន្លែជូនពលរដ្ឋនាពេលនេះ គឺដើម្បីផ្ដល់លទ្ធភាពឱ្យបងប្អូនអាចចាប់ផ្ដើមការបង្កបង្កើនផលឡើងវិញ ក្រោយពីរាជរដ្ឋាភិបាល បានដឹកនាំការងារជួយសង្គ្រោះប្រជាពលរដ្ឋពីគ្រោះមហន្តរាយទឹកជំនន់កន្លងទៅ។

នៅក្នុងឱកាសនោះដែរ សម្ដេចក្រឡាហោម ឧបនាយករដ្ឋមន្រ្តី ក៏បានជម្រាបជូនប្រជាពលរដ្ឋអំពីស្ថានភាពជំងឺកូវីដ១៩ នៅកម្ពុជា និងនៅលើពិភពលោក ដោយសម្ដេចបានសម្ដែងក្ដីសង្ឃឹមជឿជាក់ថា រដ្ឋបាលមូលដ្ឋាន និងប្រជាពលរដ្ឋនឹងបន្តបង្កើនការប្រុងប្រយ័ត្ន ហើយអនុវត្តវិធានការនានាតាមការណែនាំរបស់ក្រសួងសុខាភិបាល។

សូមជម្រាបជូនថា គ្រោះទឹកជំនន់ទឹកភ្លៀងបានធ្វើឲ្យប៉ះពាល់ដល់ផ្ទៃដីដាំដុះស្រូវចំនួន៧ក្រុង-ស្រុក ក្នុងខេត្តព្រៃវែង។ ផលស្រូវដែលប៉ះពាល់សរុបមាន៥,៦៦៨ហិកតា ខូចខាតចំនួន ៣,៥០០ហិកតា ស្មើនឹង ៣,៥០០គ្រួសារ ក្នុងនោះស្រុកបាភ្នំចំនួន៦២៦ហិកតា, ស្រុកកំពង់ត្របែកចំនួន ៧៣៦ហិកតា, ស្រុកមេសាងចំនួន៣៧៦ហិកតា,ស្រុកពាមរក៍ចំនួន៤៦៥ហិកតា, ស្រុកព្រះស្តេចចំនួន៥៧៦ហិកតា, ក្រុងព្រៃវែងចំនួន៣៦០ហិកតា និងស្រុកពោធិ៍រៀងចំនួន ៣៦១ហិកតា។

សូមបញ្ជាក់ថា អំណោយដែលផ្ដល់ជូនប្រជាពលរដ្ឋនាឱកាសនេះ ក្នុងមួយគ្រួសារទទួលបាន ស្រូវពូជ១០០គីឡូក្រាម, គ្រាប់ពូជបន្លែ៤មុខ មានស្ពែពីរមុខ ត្រប់ និងត្រកួន ព្រមទាំងឃីតមួយកញ្ចប់ មានសម្ភារៈប្រើប្រាស់ និងគ្រឿងបរិភោគ រួមទាំងថវិកាមួយចំនួនទៀតផងដែរ៕