ក្រសួងសុខាភិបាល៖ អ្នកជំងឺកូវីដ១៩ ០២នាក់បានជាសះស្បើយ (០១នាក់ ពាក់ព័ន្ធព្រឹត្តិការណ៍ ៣វិច្ឆិកា) និងមានករណីវិជ្ជមានថ្មី ០១នាក់

ដោយ៖ យូ វីរៈ | ថ្ងៃអង្គារ ទី១៧ ខែវិច្ឆិកា ឆ្នាំ២០២០ |

625

ភ្នំពេញ៖ នៅព្រឹកថ្ងៃទី១៧ ខែវិច្ឆិកា ឆ្នាំ២០២០នេះ ក្រសួងសុខាភិបាលបានប្រកាសថា មានករណីវិជ្ជមានវីរុសកូវីដ១៩ ថ្មី ០១នាក់(ករណីនាំចូល) និងមានករណីជាសះស្បើយ ០២នាក់ ក្នុងនោះមានម្នាក់ជាអ្នកដែលពាក់ព័ន្ធនឹងព្រឹត្តិការណ៍ ៣វិច្ឆិកា ។

ចំពោះករណីជាសះស្បើយ មានចំនួន ០២នាក់ ៖

១, ឯកឧត្ដម សួស យ៉ារ៉ា អាយុ ៤៧ឆ្នាំ សមាជិករដ្ឋសភា មានអាសយដ្ឋាននៅរាជធានីភ្នំពេញ ជាអ្នកពាក់ព័ន្ធនឹងព្រឹត្តិការណ៍ ៣វិច្ឆិកា កន្លងមក។

២, ស្ត្រីជនជាតិខ្មែរ អាយុ ៣១ ឆ្នាំ មានអាសយដ្ឋានស្នាក់នៅស្រុកចិត្តបុរី ខេត្តក្រចេះ បានធ្វើដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជាថ្ងៃទី១៩តុលា ២០២០។

ពួកគាត់ទាំងពីរនាក់ខាងលើ បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។

រីឯចំពោះករណីវិជ្ជមានវីរុសកូវីដ១៩ ថ្មី ចំនួន ០១នាក់វិញ គឺលើបុរសជនជាតិខ្មែរ-អាមេរិកកាំង អាយុ ៥៦ឆ្នាំ ស្នាក់នៅបុរីមួយកន្លែងក្នុងរាជធានីភ្នំពេញ បានធ្វើដំណើរមកពីសហរដ្ឋអាមេរិក បន្តជើងហោះហើរនៅប្រទេសចិន(តៃវ៉ាន់) មកដល់កម្ពុជានៅថ្ងៃទី១៥ ខែវិច្ឆិកា ឆ្នាំ២០២០។ បច្ចុប្បន្នអ្នកជំងឺត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។

សូមបញ្ជាក់ជូនថា គិតត្រឹមម៉ោង ៧ព្រឹកថ្ងៃទី១៧ ខែវិច្ឆិកា ឆ្នាំ២០២០ កម្ពុជាមានអ្នកផ្ទុកជំងឺកូវីដ១៩ សរុបចំនួន ៣០៣នាក់ អ្នកជាសះស្បើយចំនួន ២៩១នាក់ អ្នកកំពុងសម្រាកព្យាបាលចំនួន ១២នាក់ និងមិនមានករណីស្លាប់ទេ៕