ក្រសួងអប់រំ ប្រកាសបើកសាលារៀនឡើងវិញទាំងនៅភ្នំពេញ និងខេត្តកណ្ដាល បន្ទាប់ពីបានបិទដោយសារព្រឹត្តិការណ៍ ៣វិច្ឆិកា

ដោយ៖ យូ វីរៈ | ថ្ងៃព្រហស្បតិ៍ ទី១៩ ខែវិច្ឆិកា ឆ្នាំ២០២០ |

560

ភ្នំពេញ៖ ឯកឧត្ដម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានប្រកាសបើកឲ្យដំណើរការឡើងវិញនូវគ្រឹះស្ថានសិក្សាទាំងរដ្ឋ និងឯកជន ចាប់ពីថ្ងៃទី២៣ ខែវិច្ឆិកា ឆ្នាំ២០២០នេះ បន្ទាប់ពីបានបិទដោយសារវិបត្តិកូវីដ១៩ (ព្រឹត្តិការណ៍៣វិច្ឆិកា)។

ឯកឧត្ដមរដ្ឋមន្ត្រីបានមានប្រសាសន៍យ៉ាងដូច្នេះក្នុងសន្និសីទសារព័ត៌មាន ស្ដីពីការបើកដំណើរការសាលារៀនឡើងវិញ នៅព្រឹកថ្ងៃទី១៩ ខែវិច្ឆិកា ឆ្នាំ២០២០។

ឯកឧត្ដម រដ្ឋមន្ត្រីក្រសួងអប់រំ បានលើកឡើងថា បន្ទាប់ពីសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងសារបិទបញ្ចប់ព្រឹត្តិការណ៍៣វិច្ឆិកា កាលពីម្សិលមិញ ក្រសួងអប់រំក៏បានសុំគោលការណ៍ក្នុងការបើកឲ្យដំណើរការសាលារៀនឡើងវិញទាំងនៅរាជធានីភ្នំពេញ និងខេត្តកណ្ដាល។ ឯកឧត្ដមបន្តថា ក្រសួងអប់រំក៏បានអនុញ្ញាតឲ្យបើកពហុកីឡដ្ឋានជាតិអូឡាំពិកឡើងវិញ ដើម្បីឲ្យប្រជាពលរដ្ឋទូទៅចូលលេងកីឡាផ្សេងៗ ដោយត្រូវអនុវត្តតាមវិធានការអនាម័យ ក៏ដូចជាវិធានការសុខាភិបាល។

ឯកឧត្ដម អំពាវនាវផងដែរដល់គ្រឹះស្ថានសិក្សានៅទូទាំងប្រទេសបន្តអនុវត្តនូវគោលការណ៍ស្ដង់ដារសិក្សា និងអនាម័យនៅតាមគ្រឹះស្ថានសិក្សា ដើម្បីការពារការឆ្លងជំងឺកូវីដ១៩ ក្នុងសហគមន៍។

ឯកឧត្ដមរដ្ឋមន្ត្រីបានបញ្ជាក់ដែរថា ក្រសួងអប់រំនឹងរៀបចំការប្រឡងសញ្ញាបត្របឋមភូមិ(ឌីប្លូម) នៅថ្ងៃទី៣០ ខែវិច្ឆិកា ឆ្នាំ២០២០ និងការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) នៅថ្ងៃទី២១ ខែធ្នូ ឆ្នាំ២០២០ ខាងមុខនេះ៕

ពាក្យគន្លឹះទាក់ទង