គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

    ឯក​ឧត្ដម​ ម៉ម ប៊ុន​ហេង​ ​ចូល​រួម​​វេទិកា​អាស៊ាន​លើកទី៣​ ស្ដីពីកិច្ច​សហប្រតិបត្តិការ​លើវិស័យសុខាភិបាល តាម​ប្រព័ន្ធវីដេអូ

    ដោយ៖ យូ វីរៈ​​ | ថ្ងៃអង្គារ ទី២៤ ខែវិច្ឆិកា ឆ្នាំ២០២០​ |
    ឯក​ឧត្ដម​ ម៉ម ប៊ុន​ហេង​ ​ចូល​រួម​​វេទិកា​អាស៊ាន​លើកទី៣​ ស្ដីពីកិច្ច​សហប្រតិបត្តិការ​លើវិស័យសុខាភិបាល តាម​ប្រព័ន្ធវីដេអូ ឯក​ឧត្ដម​ ម៉ម ប៊ុន​ហេង​ ​ចូល​រួម​​វេទិកា​អាស៊ាន​លើកទី៣​ ស្ដីពីកិច្ច​សហប្រតិបត្តិការ​លើវិស័យសុខាភិបាល តាម​ប្រព័ន្ធវីដេអូ

    ភ្នំពេញ​៖ នៅថ្ងៃទី​២៤​ ខែវិច្ឆិកា​ ឆ្នាំ​២០២០នេះ ឯកឧត្ដម​ ម៉ម​ ប៊ុន​ហេង​ រដ្ឋមន្ត្រីក្រសួងសុខាភិបាលកម្ពុជា​ បាន​អញ្ជើញ​ចូល​រួម​វេទិកា​អាស៊ាន​ចិន​លើកទី៣​ ស្ដីពី​កិច្ច​សហប្រតិបត្តិការ​លើវិស័យ​សុខាភិបាល​ តាមរយៈ​ប្រព័ន្ធវីដេអូ​។

    វេទិកា​នេះ​តែងតែ​​រៀបចំ​ធ្វើ​ឡើងជាទៀងទាត់​រាល់​២​ឆ្នាំម្ដង​នៅ​ទីក្រុង​ណាណីង​ ខេត្ត​ក្វាងស៊ី ប្រទេសចិន​ តែដោយសារ​ស្ថានភាព​នៃ​ការរីករាល​ដាល់​នៃជំងឺកូវីដ​១៩​ វេទិកា​ឆ្នាំ​នេះ​ត្រូវ​បាន​​រៀបចំ​​តាមរយៈ​ប្រព័ន្ធវីដេអូ ​ដែលមាន​ការចូលរួម​ពី​រដ្ឋមន្ត្រី​សុខាភិបាលប្រទេស​សមាជិក​អាស៊ាន​ទាំង២០ និង​រដ្ឋមន្ត្រី​នៃ​គណៈកម្មាធិការ​សុខាភិបាល​សាធារណ​រដ្ឋ​ប្រជាមានិត​ចិន​ និង​ប្រតិភូអម​។ វេទិកា​នេះ​រៀបចំឡើងក្នុង​គោល​បំណង​ចែក​រំលែក​បទ​ពិសោធន៍​ ចំណេះដឹង​ ព្រម​ទាំង​កំណត់​អាទិភាព​នៃ​កិច្ច​សហប្រតិបត្តិការ​ រវាង​អាស៊ាន​ចិន ពិសេស​ប្រធាន​បទឆ្នាំ​នេះ​ ផ្ដោត​លើ​​ ការ​ប្រយុទ្ធ​ប្រឆាំង​នឹង​ជំងឺ​កូវីដ​១៩​ ។

    ក្នុង​វេទិកានេះផងដែរ​ ឯកឧត្ដម​ រដ្ឋមន្ត្រី​បាន​លើកឡើង​ថា​ កម្ពុជា​ គឺជាប្រទេស​មួយ​ក្នុង​ចំណោម​ប្រទេស​អាស៊ាន​ ដែលគ្រប់គ្រង​ ទប់ស្កាត់​ និ​ង​ឆ្លើយ​តប​ការរីក​រាល​ដាល​ជំងឺ​កូវីដ១៩​ បាន​ជោគជ័យ​ ក្រោម​ការដឹកនាំ​ដ៏ឈ្លាសវៃ​របស់​ប្រមុខរាជរដ្ឋាភិបាល​កម្ពុជា សម្ដេចតេជោ​ ហ៊ុន​ សែន​ ដែលបាន​ដឹកនាំ​ផ្ទាល់​គណៈ​កម្មាការ​ជាតិ​ ដើម្បី​ប្រយុទ្ធ​នឹង​ជំងឺ​កូវីដ​១៩។

    ឯកឧត្ដម​ បាន​បន្ត​ថា​ កម្ពុជា​បាន​បង្កើត​ និង​អនុវត្ត​នូ​វផែន​ការ​ឆ្លើយ​តប​ជំងឺ​កូវីដ​១៩​ ស្របតាម​ការ​ណែនាំ​របស់​អង្គការ​សុខភាពពិភពលោក​ ​ដែលមាន​វិស័យ​អាទិភាព​ចំនួន​៩ រួមមាន​៖ ទី១.ការរៀបចំផែនការ​ និង​ការគ្រប់គ្រង​ហេតុការ​ចំពោះ​មុខ​, ទី២.ការតាម​ដាន​ និង​ការវាយតម្លៃ​ហានិភ័យ​, ទី៣. ការរៀបចំមន្ទីរពិសោធន៍, ទី៤. សេវា​ថែទាំ​សុខភាព​ និង​ការ​គ្រប់គ្រងការព្យាបាល, ទី៥. ការបង្ការ​ និង​ត្រួត​ពិនិត្យ​ការចម្លង​រោគ, ទី៦. វិធានការ​សុខភាព​សាធារណៈ​មិនពាក់ព័ន្ធ​នឹង​ឱសថ, ទី៧. ទំនាក់​ទំនង​ហានិភ័យ​, ទី៨. ការគ្រប់គ្រង​ច្រក​ចេញចូល​នៅ​ព្រំដែន​ និង​ទី៩. ការគ្រប់គ្រង​ភស្ដុភា​បាន​ល្អ​។

    ឯកឧត្ដម​​រដ្ឋមន្ត្រី​បានជំរាប​ដល់​សមាជិក​ចូលរួម​ក្នុងវេទិកា​ថា​ កម្ពុជា​កំពុង​អនុវត្ត​មូលនិធិសមធម៌​ សម្រាប់​ប្រជាជន​ក្រីក្រ មូល​និធី​គាំពារសុខភាពសង្គម សម្រាប់​កម្មករ​ មន្ត្រីរាជការ​ និវត្តន៍ជន។ បន្ថែម​លើសពីនេះ សម្ដេចតេជោ​ ហ៊ុន​ សែន​ នាយករដ្ឋមន្ត្រី​នៃ​កម្ពុជា បាន​ដាក់​ឲ្យ​អនុវត្ត​នូវ​ការ​បញ្ជូន​សាច់ប្រាក់​ដោយផ្ទាល់​ដល់​ស្ត្រីមាន​ផ្ទៃ​ពោះ និង​ដល់ប្រជាជនក្រីក្រ​ និង​ប្រជាជន​ងាយរងគ្រោះ ក្នុង​អំឡុង​ពេល​នៃ​ការ​រីករាល​ដាល​ជំងឺ​កូវីដ​១៩​នេះផងដែរ​។

    ឯកឧត្ដម​ រដ្ឋមន្ត្រី​ក្រសួងសុខាភិបាល​ ក៏បាន​សង្គត់​ធ្ងន់​ផងដែរថា​ ប្រទេស​កម្ពុជា​គាំទ្រ​យ៉ាង​ពេញទំហឹង​ចំពោះ​ភាព​ជាអ្នក​ដឹកនាំ​ គ្រប់គ្រង​ ទប់ស្កាត់​ និង​ឆ្លើយ​តប​បាន​ទាន់​ពេលវេលា​របស់គណៈ​កម្មាធិការ​សុខាភិបាល​សាធារណរដ្ឋប្រជាមានិត​ចិន​ និង​ការ​សម្រប​សម្រួល​របស់អង្គការ​សុខភាពពិភពលោក​ ក្នុង​ការ​ឆ្លើយ​តប​ជាសកល​ទៅនឹង​ជំងឺ​កូវីដ​១៩​ ក៏ដូច​ជា​ការ​ចូ​លរួម​របស់ប្រទេស​សមាជិក​អាស៊ាន​ទាំងអស់​ ដែល​បាន​សហការ​ចូលរួម​ប្រយុទ្ធ​នឹង​ជំងឺ​កូវីដ​១៩៕

     

    អត្ថបទទាក់ទង