ការប្រឡងឌីប្លូមចាប់ផ្ដើមនៅថ្ងៃនេះ តែត្រូវអនុវត្តតាមវិធានសុខាភិបាល ខណៈផ្ទុះករណីឆ្លងក្នុងសហគមន៍លើកដំបូង

ដោយ៖ យូ វីរៈ | ថ្ងៃចន្ទ ទី៣០ ខែវិច្ឆិកា ឆ្នាំ២០២០ |

709

ភ្នំពេញ ៖ នៅថ្ងៃទី៣០ ខែ វិច្ឆិកានេះ ជាថ្ងៃចាប់ផ្ដើមការប្រឡងសញ្ញាប័ត្រមធ្យមសិក្សាបឋមភូមិទូទាំងប្រទេស ស្របពេលនឹងការផ្ទុះឡើងនូវព្រឹត្តិការណ៍ ២៨ វិច្ឆិកា ដែលត្រូវបានចាត់ទុកថាជាករណីឆ្លងក្នុងសហគមន៍ ដូច្នេះក្រសួងអប់រំ បានតម្រូវឱ្យគ្រប់សាលាអនុវត្តឱ្យបានខ្ជាប់ខ្ជួនបំផុតនូវវិធានការសុខាភិបាល ដើម្បីទប់ស្កាត់ការឆ្លងរាលដាលកូវីដ១៩ បន្ថែមទៀត។

ការចាប់ផ្ដើមប្រឡងសញ្ញាប័ត្រមធ្យមសិក្សាបឋមភូមិថ្ងៃទី ៣០ វិច្ឆិកានេះ ក្រសួងអប់រំ យុវជន និង កីឡា បានតម្រូវឱ្យគ្រប់សាលា ដែលរៀបចំការប្រឡង អនុវត្តវិធានការការពារឱ្យបានតឹងរ៉ឹងបំផុត ក្នុង កាលៈទេសៈនេះ ដើម្បីទប់ស្កាត់ការចម្លងកូវីដ១៩។ ជាក់ស្ដែងសម្រាប់វិទ្យាល័យច្បារអំពៅ នៅព្រឹកនេះ បានដាក់ចេញនូវវិធានការអនាម័យ ការវាស់កម្ដៅ ការរក្សាគម្លាត និងការពាក់ម៉ាសការពារជាដាច់ខាត សម្រាប់គ្រប់បុគ្គលិកសាលា ក៏ដូចជា បេក្ខជនប្រឡងទាំងអស់ផងដែរ។

លោក ហៀង សុខេង នាយកវិទ្យាល័យច្បារអំពៅ បានអះអាងថា ក្នុងរយៈពេលពីរថ្ងៃ នៃការប្រឡងនេះ សាលា នឹងអនុវត្តវិធានការការពារឱ្យបានខ្ជាប់ខ្ជួនដើម្បីសុវត្ថិភាពរបស់សិស្ស។ ការប្រឡងក្នុងអំឡុងពេល នៃការផ្ទុះរាលដាលកូវីដ១៩ ចូលសហគមន៍នេះ បេក្ខជនប្រឡង បាន ប្រុងប្រយ័ត្នការពារខ្លួន តាមការណែនាំរបស់សាលា។

ការឆ្លងជំងឺកូវីដ១៩ ចូលសហគមន៍នាពេលនេះ ក្រសួងអប់រំ ក៏បានសម្រេចផ្អាកការសិក្សា របស់ គ្រឹះស្ថានសិក្សាឯកជនទូទាំងប្រទេស ក្នុងរយៈពេលពីរសប្ដាហ៍ ដោយត្រូវបន្តការសិក្សាតាមប្រព័ន្ធអេឡិច ត្រូនិក លើកលែងតែសិស្សថ្នាក់ទី១២ ដែលត្រូវបន្តការសិក្សាសម្រាប់ត្រៀមប្រឡងបាក់ឌុប។ សម្រាប់គ្រឹះ ស្ថានសិក្សាសាធារណៈវិញ ក្រសួងអប់រំ ក៏បានសម្រេចបិទបញ្ចប់ឆ្នាំសិក្សា២០១៩–២០២០ ត្រឹមថ្ងៃទី ៣០ ខែវិច្ឆិកា នេះផងដែរ តែនៅអនុញ្ញាតឱ្យសិស្សថ្នាក់ទី១២ បន្តការសិក្សាដើម្បីត្រៀមប្រឡងនៅខែក្រោយ៕ ប្រភព៖ BTVNews