សម្ដេចតេជោ ហ៊ុន សែន ថ្លែងអំណរគុណមហាសេដ្ឋីម៉ាឡេស៊ី ដែលបរិច្ចាគថវិកា ៥លានដុល្លារ សម្រាប់ទិញវ៉ាក់សាំងប្រឆាំងកូវីដ១៩

ដោយ៖ យូ វីរៈ | ថ្ងៃសុក្រ ទី១១ ខែធ្នូ ឆ្នាំ២០២០ |

1,155

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានផ្ញើលិខិតថ្លែងអំណរគុណ ដល់លោក Tan Sri Dato ‘Dr CHEN LIP KEONG ដែលបានបរិច្ឆាគថវិកាចំនួន ៥លានដុល្លារ ដល់រាជរដ្ឋាភិបាលកម្ពុជា សម្រាប់ទិញវ៉ាក់សាំងប្រឆាំងនឹងកូវីដ១៩។

នៅក្នុងសារលិខិតសម្ដេចតេជោ បានសរសេរថា «ក្នុងនាមរាជរដ្ឋាភិបាល និងប្រជាជនកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះ តាន់ស៊្រី ដែលបានចូលរួមចំណែកជាថវិកាចំនួន ៥ ០០០ ០០០(ប្រាំលាន) ដុល្លារអាមេរិក ដល់រាជរដ្ឋាភិបាលសម្រាប់ទិញវ៉ាក់សាំងចាក់ការពារជំងឺ COVID-19 ដើម្បីការពារអាយុជីវិតប្រជាជនកម្ពុជា។»

សម្តេចតេជោ បានគូសបញ្ជាក់នៅក្នុងលិខិតថា វិភាគទានដែលលោក តាន់ស៊្រី ផ្ដល់មកនាពេលនេះ ពិតជាមានតម្លៃដែលមិនអាចកាត់ថ្លៃបាន ហើយនឹងត្រូវចងចាំទុកក្នុងប្រវត្តិសាស្ត្ររបស់ប្រជាជនកម្ពុជា

សូមជម្រាបជូនថា សម្តេចតេជោ ហ៊ុន សែន កាលពីល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងបង្ការជំងឺកូវីដ១៩ ដើម្បីយកមកចាក់ ជូនប្រជាជនដោយឥតគិតថ្លៃ ដែលជាជំហានដំបូង សម្ដេចគ្រោងទិញចំនួន ១លានដូស ដើម្បីចាក់ប្រជាពលរដ្ឋប្រមាណ ៥០ម៉ឺននាក់ ដែលជាអ្នកប្រឈមមុខខ្ពស់ជាមួយជំងឺកូវីដ១៩។ គិតត្រឹមរសៀលថ្ងៃទី១១ ខែធ្នូ ឆ្នាំ២០២០នេះ ថវិការបស់សប្បុរសជនមានជាង ៤៥លានដុល្លារអាមេរិកហើយ៕