សម្តេចកិត្តិព្រឹទ្ធបណ្ឌិត ក្រាបបង្គំទូលថ្វាយអំណរព្រះរាជគុណសម្តេចម៉ែដែលបានប្រទានពរជ័យនាឱកាសថ្ងៃខួបកំណើត
សម្តេចកិត្តិព្រឹទ្ធបណ្ឌិត ក្រាបបង្គំទូលថ្វាយអំណរព្រះរាជគុណសម្តេចម៉ែដែលបានប្រទានពរជ័យនាឱកាសថ្ងៃខួបកំណើត
តបនឹងព្រះរាជសារប្រទានពរជ័យថ្ងៃខួបកំណើត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានថ្វាយលិខិតថ្លែងអំណរព្រះគុណដល់អង្គសម្តេចម៉ែ ដែលបានប្រទានពរជ័យ។
ក្នុងសារលិខិតសម្ដេចកិត្តិព្រឹទ្ធបណ្ឌិតមានប្រសាសន៍ថា សម្តេចមានសេចក្តីរីករាយឥតឧបមា ដោយបានទទួលនូវព្រះរាជសារប្រទានពរជ័យ ដែលមានអត្ថន័យ ជ្រាលជ្រៅ និងព្រះរាជទ្រព្យ ចំនួន 10,000 USD (ដប់ពាន់ដុល្លារសហរដ្ឋអាមេរិក) ព្រមទាំងផ្កាស្រស់ល្អ ១ កន្ត្រក ដែលជាព្រះរាជទានដ៏ថ្លៃថ្លា អំពី សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈ ដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យប្រោសព្រះរាជទានដល់សម្តេចក្នុងឱកាសទិវាខួបកំណើតរបស់ សម្តេចនៅថ្ងៃទី១៥ ខែធ្នូ ឆ្នាំ២០២០។
សម្តេចក៏បានថ្លែងអំណរព្រះរាជគុណដ៏ខ្ពង់ខ្ពស់ជាទីបំផុត ចំពោះព្រះរាជទាន នូវព្រះរាជទ្រព្យដ៏ឧត្តុង្គ ឧត្តមខាងលើនេះ ហើយដែល សម្តេចនឹងប្រើប្រាស់ព្រះរាជទ្រព្យដ៏ឧត្តុង្គឧត្តមនេះ ជីកអណ្តូងទឹកស្អាត ជូន ប្រជារាស្ត្រក្រីក្រ តាមជនបទក្នុងព្រះរាជាណាចក្រកម្ពុជា។ សម្តេចចងចាំជានិច្ចនូវព្រះរាជគុណូបការៈដ៏ថ្លៃថ្លា របស់ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គតែងតែ ប្រោសព្រះរាជទាន ដល់សម្តេចនិងក្រុមគ្រួសារ ជាការលើកទឹកចិត្តដល់សម្តេចដើម្បីខិតខំបម្រើជាតិ មាតុភូមិ និងប្រជារាស្ត្រកម្ពុជា។
សម្តេចបានបួងសួងដល់គុណបុណ្យព្រះរតនត្រ័យ តេជះបារមីវត្ថុស័ក្តិសិទ្ធិនានាក្នុងលោក ទេវតារក្សា ព្រះមហាស្វេតច្ឆត្រ និងព្រះបារមីនៃព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ សូមព្រះមេត្តាប្រោសព្រះរាជទានព្រះពរជ័យ សិរីមង្គល មហាប្រសើរថ្វាយ សម្តេចព្រះមហាក្សត្រី ព្រះវររាជ មាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះបរមសុខគ្រប់ប្រការ ជាម្លប់ដ៏ត្រជាក់ សម្រាប់ប្រជារាស្ត្រគ្រប់ៗរូប នៅទូទាំងព្រះរាជាណាចក្រកម្ពុជា តរៀងទៅ៕
