ការនាំចេញផលិតពីវិស័យកាត់ដេរ មានតម្លៃ ជាង៨ពាន់លានដុល្លារត្រឹម១០ខែ ឆ្នាំ២០២០

ដោយ៖ យូ វីរៈ | ថ្ងៃពុធ ទី១៦ ខែធ្នូ ឆ្នាំ២០២០ |

414

ភ្នំពេញ ៖ កម្ពុជាបាននាំចេញផលិតសំលៀកបំពាក់ ស្បែកជើង និងផលិតធ្វើដំណើរ មានទំហំទឹកប្រាក់សរុប ៨,២ ពាន់លានដុល្លារ នៅក្នុងរយៈពេល ១០ខែ ឆ្នាំ២០២០។

តួលេខពីអគ្គនាយកដ្ឋានពន្ធគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ បង្ហាញថា ការនាំចេញផលិតពីវិស័យកាត់ដេរ នេះ បានធ្លាក់ចុះ ៩ភាគរយ ធៀបនឹងរយៈពេល១០ខែ ឆ្នាំ២០១៩ កន្លងទៅ។ ការថយចុះតម្លៃនាំចេញផលិតផលកាត់ដេរ សំលៀកបំពាក់ ស្បែកជើង និងកាបូបរបស់កម្ពុជា គឺដោយសារពិភពលោកកំពុងរឹតបន្តឹងវិធានការបង្ការជំងឺកូវីដ១៩ ដែលធ្វើឲ្យការបញ្ជាទិញ និងការដឹកជញ្ជូន ជាពិសេសការផ្គត់ផ្គង់វត្ថុធាតុដើមរងផលប៉ះពាល់។

របាយការណ៍ដដែលបង្ហាញថា គិតចាប់ពីខែមករា ដល់ខែតុលា កម្ពុជា បាននាំចេញសំលៀកបំពាក់ មានទឹកប្រាក់សរុប ៦,១ ពាន់លានដុល្លារ ធ្លាក់ចុះ ១០ ភាគរយ ការនាំចេញផលិតស្បែកជើង មានទឹកប្រាក់សរុប ៩២៩ លានដុល្លារ ធ្លាក់ចុះ ៦ភាគរយ និងផលិតផលដំណើរ មានកាបូប និងវ៉ាលី មានតម្លៃសរុប ៧៨៨ លានដុល្លារ ធ្លាក់ចុះ ១១ភាគរយ។ ចំណែកការនាំចេញផលិតវាយនភណ្ឌផ្សេងទៀត មានតម្លៃសរុប ៣៣២ លានដុល្លារ ថយចុះ៣៧ភាគរយ។

នៅក្នុងរយៈពេល១០ខែនេះ ទីផ្សារសហរដ្ឋអាមេរិក ជាទីផ្សារធំបំផុតសម្រាប់ផលិតផលកាត់ដេររបស់កម្ពុជា ដែលបាននាំចូល តំណាងឲ្យប្រមាណ ៣៧ភាគរយ នៃការនាំចេញសរុប ឬមានទឹកប្រាក់សរុបជាង ៣ពាន់លានដុល្លារ។

ការនាំចេញផលិតផលកាត់ដេរទៅកាន់ទីផ្សារអឺរ៉ុប តំណាង ២២ភាគរយ ឬស្មើនឹងទឹកប្រាក់ ២,១ពាន់លានដុល្លារ ទៅកាន់ប្រទេសជប៉ុន តំណាង ១០ភាគរយ ស្មើនឹង ៧៣១ លានដុល្លារ និងទៅកាន់ប្រទេសអង់គ្លេស រួមចំណែក ៧ភាគរយ ឬស្មើនឹង ៦១៥លានដុល្លារ។ ចំណែកការនាំចេញទៅកាន់ទីផ្សារប្រទេសអាស៊ាន មានតម្លៃសរុប ១៩០ លានដុល្លារ និងទីផ្សារដទៃផ្សេងទៀត មានទឹកប្រាក់សរុប ១,៤ពាន់លានដុល្លារ។

យោងតាមរបាយការណ៍របស់ធនាគារជាតិនៃកម្ពុជា ការនាំចេញផលិតផលរបស់កម្ពុជាមានតម្លៃ ១៤,៦ ពាន់លានដុល្លារ កាលពីឆ្នាំ ២០១៩ កើនឡើង ១២,៧ ភាគរយ ធៀបនឹងឆ្នាំ ២០១៨ ខណៈការនាំចូលមាន ចំនួន ២២,៣ ពាន់លានដុល្លារកើនឡើង ១៨,៦ ភាគរយ៕ ប្រភព៖ BTVNews

អត្ថបទទាក់ទង