ក្រសួងសុខាភិបាល រកឃើញករណីជាសះស្បើយ ០២នាក់ និងមិនមានឆ្លងវីរុសកូវីដ១៩ ថ្មី ទេ

ដោយ៖ យូ វីរៈ | ថ្ងៃអង្គារ ទី២២ ខែធ្នូ ឆ្នាំ២០២០ |

406

ភ្នំពេញ៖ ក្រសួងសុខាភិបាល នៅព្រឹកថ្ងៃទី២២ ខែធ្នូ ឆ្នាំ២០២០ បានចេញសេចក្ដីជូនព័ត៌មានមួយស្ដីពីស្ថានភាពនៃជំងឺកូវីដ១៩ ដោយបានបញ្ជាក់ថា មានករណីជាសះស្បើយចំនួន ០២នាក់ ក្នុងនោះ អ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ០១នាក់ ឯ ០១នាក់ទៀតជាអ្នកដំណើរចូលមកកម្ពុជា និងមិនមានករណីឆ្លងថ្មីទេ សម្រាប់ថ្ងៃទី២១ ខែធ្នូ ឆ្នាំ២០២០។

១. ស្ត្រីជនជាតិខ្មែរអាយុ ៣២ឆ្នាំ មានអាសយដ្ឋានស្នាក់នៅបូរី លឹម ឈាងហាក់ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ១៩ ចំនួន០២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។

២. បុរសជនជាតិខ្មែរ អាយុ ៧៥ឆ្នាំ មានអាសយដ្ឋានស្នាក់នៅសង្កាត់ផ្សារថ្មី ខណ្ឌដូនពេញ រាជធានីភ្នំពេញ ជាអ្នកដំណើរមកពីប្រទេសចិន តាមជើងហោះហើរ ត្រូវបានព្យាបាលជាសះស្បើយ ដោយបានទទួលលទ្ធផលតេស្ត អវិជ្ជមានវីរុសកូវីដ១៩ ចំនួន ០២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។

សូមជម្រាបជូនថា អ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា ពីថ្ងៃទី២៨ ខែវិច្ឆិកា ដល់ថ្ងៃទី២១ ខែធ្នូ ឆ្នាំ២០២០ សរុបមានចំនួន ៤១នាក់ ដែលក្នុងចំនួននេះ មានអ្នកជាសះស្បើយចំនួន ៣១នាក់ហើយ។

សូមបញ្ជាក់ថា គិតត្រឹមព្រឹកថ្ងៃទី២២ ខែធ្នូ ឆ្នាំ២០២០នេះ កម្ពុជាមានអ្នកមានវីរុសកូវីដ១៩ សរុបចំនួន ៣៦៣ នាក់ (ករណីនាំចូល ៣២២, ព្រឹត្តិការណ៍សហគមន៍ ២៨វិច្ឆិកា ៤១នាក់) ក្នុងនោះអ្នកជាសះស្បើយមានចំនួន ៣៤៧នាក់ អ្នកកំពុងសម្រាកព្យាបាលនៅមន្ទីរពេទ្យចំនួន ១៦នាក់ និងមិនមានអ្នកស្លាប់ទេ៕