ព្រឹទ្ធសភា​អនុម័ត​ទាំងស្រុង​លើ​សេចក្តី​ព្រាង​ច្បាប់​ចំនួន​៧​ នឹង​ត្រៀម​ថ្វាយ​ព្រះមហាក្សត្រ​ឡាយ​ព្រះហស្ថ​លេខា

ព្រឹទ្ធសភា​អនុម័ត​ទាំងស្រុង​លើ​សេចក្តី​ព្រាង​ច្បាប់​ចំនួន​៧​ នឹង​ត្រៀម​ថ្វាយ​ព្រះមហាក្សត្រ​ឡាយ​ព្រះហស្ថ​លេខា

ភ្នំពេញ៖ ព្រឹទ្ធសភា នៃ​ព្រះរាជា​ណា​ចក្រ​កម្ពុជា បានសម្រេចអនុម័តទាំងស្រុង​លើ​សេចក្តីព្រាងច្បាប់ចំនួន៧ ដោយសំឡេងគាំទ្រចំនួន​៥៧​លើ៥៧​សំឡេង ​នៅ​ក្នុងប្រជុំលើក៦ ព្រឹទ្ធសភានីតិកាលទី៤ រយៈ​ពេល​ ២ថ្ងៃ​មកនេះ ក្រោមអធិបតីភាពសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា។

កិច្ច​ប្រជុំ​លើកទី៦ ព្រឹទ្ធសភានីតិកាលទី៤ បាន​ធ្វើ​ឡើង​រយៈ​ពេល​២ថ្ងៃ គឺ​ថ្ងៃទី​២១ និង​ថ្ងៃទី​២២ ខែធ្នូ ឆ្នាំ​២០២០ ដោយ​មាន​សមាជិក​ព្រឹទ្ធសភា​ចូល​រួម​សរុប​ចំនួន​ ៥៧រូប។ នៅថ្ងៃទី​២១​ធ្នូ កិច្ច​ប្រជុំ​បាន​សម្រេច​អនុម័តទាំងស្រុង​លើ​សេចក្ដីព្រាង​ច្បាប់​ចំនួន​ ៤​ ហើយ​នៅថ្ងៃទី​២២​ធ្នូនេះ កិច្ច​ប្រជុំ​ក៏បាន​សម្រេចអនុម័តទាំងស្រុង​លើ​សេចក្ដីព្រាង​ច្បាប់​ចំនួន​ ៣បន្ថែម​ទៀត​ ដោយ​ទទួលបាន​សំឡេង​គាំទ្រ​ ៥៧​លើ​៥៧សំឡេង​។​

បន្ទាប់ពីកិច្ចប្រជុំលើក៦ព្រឹទ្ធសភានីតិកាលទី៤ បាន​បញ្ចប់​ ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា បានបញ្ជាក់ឲ្យដឹងថា សេចក្តីព្រាងច្បាប់ទាំង៧នោះត្រូវបានសមាជិកព្រឹទ្ធសភាសម្រេចអនុម័ត និងផ្តល់យោបល់ដោយបន្ទាន់រួចរាល់ជាស្ថាពរ ហើយនឹងត្រៀមថ្វាយព្រះមហាក្សត្រ ឡាយព្រះហស្ថលេខានាពេលខាងមុខនេះផងដែរ។

សេចក្តីព្រាងច្បាប់ទាំង៧នោះ រួមមាន៖

១-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១

២-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៩។

៣-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីមូលបត្ររដ្ឋ

៤-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការរៀបចំ និងការប្រព្រឹត្តទៅនៃអាជ្ញាធរសេវាហិរញ្ញវត្ថុមិនមែនធនាគារ

៥-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងអាស៊ាន ស្តីពីការទទួលស្គាល់ទៅវិញទៅមកលើការផ្តល់អាជ្ញាបណ្ណក្រុមអាកាសយានិក

៦-  ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការអនុម័តយល់ព្រមលើ៖

• ពិធីសារទី៣ ស្តីពីសិទ្ធិសហការលើជើងហោះហើរក្នុងស្រុក ក្នុងរង្វង់ទឹកដីនៃប្រទេសជាសមាជិកអាស៊ានណាមួយ ។
• ពិធីសារទី៤ ស្តីពីសិទ្ធិហោះហើរកូធ័រមីណល រវាងអាកាសយានដ្ឋាននៅក្នុងទឹកដីនៃប្រទេសជាសមាជិកអាស៊ាន។

៧-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការអនុម័តយល់ព្រមលើពិធីសារអនុម័តកញ្ចប់កិច្ចសន្យាទី៩ និងទី១០ នៃសេវាកម្មដឹកជញ្ជូនតាមផ្លូវអាកាសក្រោមកិច្ច-ព្រមព្រៀងក្របខ័ណ្ឌអាស៊ាន ស្តីពីសេវាកម្ម៕