ពលករខ្មែរ​ជាង​ ៩​ពាន់​នាក់​នៅ​ខេត្ត​សាមុទ្រ​សាខន​ មិនមា​ន​ឆ្លង​កូវីដ​១៩ ​ទេ​

ពលករខ្មែរ​ជាង​ ៩​ពាន់​នាក់​នៅ​ខេត្ត​សាមុទ្រ​សាខន​ មិនមា​ន​ឆ្លង​កូវីដ​១៩ ​ទេ​

ភ្នំពេញ​៖ គិត​ត្រឹម​ថ្ងៃទី២៤​ធ្នូនេះ ពលករខ្មែរប្រមាណជាង៩ពាននាក់ នៅខេត្តសាមុទ្រសាខន  ប្រទេសថៃ  មិនមានឆ្លងជំងឺកូវីដ១៩ ឡើយ  ទោះបីក្នុងពេលបច្ចុប្បន្នប្រទេសថៃកំពុងមានការបន្តផ្ទុះករណីឆ្លងជំងឺកូវីដ១៩ ជាសហគមន៍ ។ នេះបើតាមការ​ឲ្យ​ដឹង​ពី​ឯកឧត្តម  អ៊ូក  សោភ័ណ ឯក​អគ្គ​រាជ​ទូត​កម្ពុជា​ប្រចាំ​ប្រទេស​ថៃ។

ឯកអគ្គរាជទូតកម្ពុជាប្រចាំប្រទេសថៃបានឱ្យដឹងថា  គិតត្រឹមខែវិច្ឆិកា ក្នុងឆ្នាំ២០២០  មានពលករខ្មែរស្របច្បាប់ប្រមាណជាង៥០ម៉ឺនដែលកំពុងរស់នៅ  និងធ្វើការនៅប្រទេសថៃ  ក្នុងនោះសម្រាប់ខេត្តសាមុទ្រសាខនដែលមានការផ្ទុះឡើងនូវករណីឆ្លងជាសហគមន៍ទ្រង់ទ្រាយធំ មានពលករខ្មែរប្រមាណ៩ពាន់នាក់ ដែលកំពុងបន្តការងារនៅទីនោះ។ ឯកឧត្ដមបន្តថា ក្នុងពេលស្ថានភាពប្រទេសថៃកំពុងបន្តកើនឡើងនូវករណីឆ្លងកូវីដ១៩  សម្រាប់ខេត្តសាមុទ្រសាខន ដែលជាតំបន់ដំបូងផ្ទុះនូវករណីជំងឺកូវីដ១៩ ចូលសហគមន៍ទ្រង់ទ្រាយធំ  គិតត្រឹមថ្ងៃនេះ មិនមានពលករខ្មែរណាម្នាក់នៅក្នុងខេត្តនេះ ឆ្លងជំងឺកូវីដ១៩ឡើយ។

ឯកឧត្តម  អ៊ូក  សោភ័ណ  បានបន្តទៀតថា  ស្ថានទូតកម្ពុជាប្រចាំប្រទេសថៃនឹងបន្តសហការយ៉ាងជិតស្និទ្ធជាមួយ ក្រសួងការងារ  និងក្រសួងសុខាភិបាលថៃ  ព្រមទាំងអាជ្ញាធរពាក់ព័ន្ធប្រទេសថៃ ដើម្បីការពារពលករខ្មែរ។ ជាមួយគ្នានេះ ឯកអគ្គរាជទូតកម្ពុជាប្រចាំប្រទេសថៃ បានអំពាវនាវដល់បងប្អូនពលករខ្មែរទាំងអស់មេត្តាបន្តចូលរួមសហការអនុវត្តវិធានការរបស់រាជរដ្ឋាភិបាលប្រទេសទាំង២ឱ្យបានខ្ជាប់ខ្ជួន  និងមានប្រសិទ្ធភាពខ្ពស់  ដើម្បីទប់ស្កាត់ការរាលដាលជំងឺកូវីដ១៩។

សូមជម្រាបជូនថា  ក្រសួងការងារថៃបានចេញសេចក្តីប្រកាសស្តីពីការស្នើកិច្ចសហការសហគ្រាស  ក្រុមហ៊ុននានា  ត្រូវអនុវត្តហាមពលករចល័តចេញចូលតំបន់ដែលមានផ្ទុះករណីជំងឺកូវីដ១៩ ដោយត្រូវមានវិធានការការពារនិងអនុវត្តរួមមាន  ត្រូវវាស់កម្តៅ និងប្រសិនបើពលករបរទសនោះមានអាការ:ក្តៅ  ឬក្អកត្រូវអនុញ្ញាតឱ្យសម្រាកពីការងារជាបន្ទាន់  ឬរាយការណ៍ជាបន្ទាន់ទៅភ្នាក់ងារសុខាភិបាល  ដើម្បីធ្វើចត្តាឡីស័កភា្លមៗ,  ត្រូវលាងសម្អាតដៃ ដោយអាល់កុល ជាប្រចាំនៅកន្លែងធ្វើការ ,  ពលករត្រូវពាក់ម៉ាស  ស្រោមដៃ  និងរក្សាគម្លាតប្រវែង២ម៉ែត្រអំឡុងពេលបំពេញការងារ ,  ផ្សព្វផ្សាយពលករឱ្យយល់ដឹងពីវិធីបង្ការជំងឺកូវីដ១៩ ដើម្បីជៀសវាងការឆ្លងរាតត្បាតពីជំងឺកូវីដ១៩៕