រាជរដ្ឋាភិបាលថៃ សម្រេចផ្អាកការអនុញ្ញាតឲ្យពលរដ្ឋខ្មែរចូលដឹកជញ្ជូន និងត្រួតពិនិត្តទំនិញនៅផ្សាររ៉ុងក្លឿ
រាជរដ្ឋាភិបាលថៃ សម្រេចផ្អាកការអនុញ្ញាតឲ្យពលរដ្ឋខ្មែរចូលដឹកជញ្ជូន និងត្រួតពិនិត្តទំនិញនៅផ្សាររ៉ុងក្លឿ
រាជរដ្ឋាភិបាលនៃព្រះរាជាណាចក្រថៃ នឹងធ្វើការផ្អាកការអនុញ្ញាតឲ្យប្រជាពលរដ្ឋខ្មែរចូលដឹកជញ្ជូន និងត្រួតពិនិត្យទំនិញនៅផ្សាររ៉ុងក្លឿ ស្រុកអារញ្ញប្រាថេត ខេត្តស្រះកែវ ចាប់ពីថ្ងៃទី១០ ខែមករា ឆ្នាំ២០២១ខាងមុខនេះ។
យោងតាមលិខិតលេខ សក ០០១៧.២/០១០១ ចុះថ្ងៃទី០៥ ខែមករា ឆ្នាំ២០២១ របស់រដ្ឋបាលខេត្តស្រះកែវ បានឲ្យដឹងថា ដោយបច្ចុប្បន្ននៅក្នុងព្រះរាជាណាចក្រថៃ មានការរីករាលដាលខ្លាំងការឆ្លងជំងឺកូវីដ១៩ ដែលជារលកថ្មី ក្នុងប្រទេស និងមានខេត្តជាច្រើន ពិសេសបណ្ដាខេត្តនៅតាមព្រំដែន។
ជាមួយគ្នានេះ រដ្ឋបាលក្រុងប៉ោយប៉ែត នឹងធ្វើការផ្អាកការបំពេញបែបបទអនុញ្ញាតឲ្យបងប្អូនអាជីវករលក់ដូរនៅផ្សាររោងក្លឿ ស្រុកអារញ្ញប្រាថេត ខេត្តស្រះកែវ ព្រះរាជាណាចក្រថៃ ចេញចូល ដឹកជញ្ជូន និងត្រួតពិនិត្យទំនិញ ចាប់ពីថ្ងៃទី០៨ ខែមករា ឆ្នាំ២០២១នេះ។
ចំពោះបងប្អូនអាជីវករដែលកំពុងស្នាក់នៅទឹកដីនៃព្រះរាជាណាចក្រថៃ និងក្នុងផ្សាររ៉ុងក្លឿ សូមមេត្តបន្តចូលរួមសហការ និងអនុវត្តវិធានការនានារបស់រាជរដ្ឋាភិបាលថៃ ដើម្បីចូលរួមបង្ការ និងទប់ស្កាត់ការរីករាលដាលនៃជំងឺកូវីដ១៩ បន្តទៀត។
សូមជម្រាបជូនថា រាជរដ្ឋាភិបាលថៃ បានប្រកាសបន្តដាក់ប្រទេសក្នុងគ្រាអាសន្ន ចាប់ពីថ្ងៃទី១៦ ខែមករា ដល់ថ្ងៃទី២៨ ខែកុម្ភៈ ឆ្នាំ២០២១ ដើម្បីបន្តទប់ស្កាត់ និងគ្រប់គ្រងការរីករាលដាលការឆ្លងនៃជំងឺកូវីដ១៩ រលកថ្មីក្នុងប្រទេសថៃ៕
