ក្រសួងសុខាភិបាល ណែនាំវិធានការសំខាន់ៗចំនួន៤ ដើម្បីការពារការចម្លងវីរុសកូវីដ១៩ ក្នុងអំឡុងពិធីបុណ្យចូលឆ្នាំខ្មែរ និងពិធីសែនដូនតាផ្សេងៗ

ដោយ៖ យូ វីរៈ | ថ្ងៃចន្ទ ទី១ ខែកុម្ភៈ ឆ្នាំ២០២១ |

1,323

ភ្នំពេញ៖ បើទោះបីជាប្រទេសកម្ពុជា បាន និងកំពុងខិតខំទប់ស្កាត់កុំឲ្យមានការចម្លងវីរុសកូវីដ១៩ នៅក្នុងសហគមន៍យ៉ាងមានប្រសិទ្ធភាពល្អហើយក៏ដោយ ក៏ជំងឺដ៏ដាចសាហាវនេះនៅតែជាការគំរាមកំហែងសុខភាពសាធារណៈ ហើយលទ្ធភាពនៃការចម្លងវីរុសនេះនៅក្នុងប្រទេសក៏នៅខ្ពស់នៅឡើយដោយសារប្រទេសជិតខាងយើងមាន ប្រទេសថៃ និងប្រទេសវៀតណាម កំពុងមានការផ្ទុះឡើងការចម្លងវីរុសកូវីដ១៩ ជាថ្មីទៀតនៅក្នុងសហគមន៍។

ក្រសួងសុខាភិបាល បានអំពាវនាវ និងក្រើនរំលឹកដល់បងប្អូនប្រជាពលរដ្ឋទាំងអស់បន្តអនុវត្តការការពារការចម្លងវីរុសកូវីដ១៩ ដោយបង្កើនការប្រុងប្រយ័ត្នខ្ពស់ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ និងពិធីសែនព្រេននានា នាពេលខាងមុខនេះ។ ក្រសួងក៏បានធ្វើការណែនាំ ដើម្បីអនុវត្តឲ្យបានគ្រប់ៗគ្នា នូវវិធានការសំខាន់ៗចំនួន ៤រួមមាន៖

១- ត្រូវពាក់ម៉ាស់ រក្សាអនាម័យដៃ និងរក្សាគម្លាតសុវត្ថិភាពបុគ្គល

២- ជ្រើសរសើការជួបជុំគ្រួសារ ឬដំណើរកម្សាន្តប្រកបដោយសុវត្ថិភាពមិនមានការចម្លងជំងឺកូវីដ១៩

៣- ជ្រើសរើសមធ្យោបាយធ្វើដំណើរមានសុវត្ថិភាព កាត់បន្ថយជាអតិប្បរិមា នូវការចម្លងជំងឺកូវីដ១៩ និងគ្រោះថ្នាក់ចរាចរណ៍

៤- ជ្រើសរើសទីកន្លែងស្នាក់នៅប្រកបដោយសវុត្ថិភាព កាត់បន្ថយហានិភ័យនៃ ការចម្លងជំងឺកូវីដ១៩