អ្នកជំងឺកូវីដ១៩ ចំនួន ០៣នាក់ទៀត បានជាសះស្បើយ ខណៈមិនមានករណីឆ្លងថ្មីទេ

ដោយ៖ យូ វីរៈ | ថ្ងៃពុធ ទី៣ ខែកុម្ភៈ ឆ្នាំ២០២១ |

424

ភ្នំពេញ៖ ក្រសួងសុខាភិបាល នៅថ្ងៃទី០៣ ខែកុម្ភៈ ឆ្នាំ២០២១ នេះ បានចេញសេចក្ដីជូនព័ត៌មានមួយដោយបានបញ្ជាក់ថា មានអ្នកជំងឺកូវីដ១៩ ចំនួន ០៣នាក់ទៀតហើយបានជាសះស្បើយ និងមិនមានករណីវិជ្ជមានវីរុសនេះទេ សម្រាប់ថ្ងៃទី០២កុម្ភៈ។

ករណីជាសះស្បើយចំនួន ០៣នាក់នេះគឺសុទ្ធជាពលករដែលបានធ្វើដំណើរមកពីប្រទេសថៃ៖

១- ស្ត្រីជនជាតិខ្មែរ អាយុ៣១ឆ្នាំ មានអាសយដ្ឋានស្នាក់នៅឃុំស្ទឹងកាន់ ស្រុកសាលាក្រៅ ខេត្តប៉ៃលិន បានធ្វើដំណើរមកពីប្រទេសថៃមកដល់កម្ពុជានៅថ្ងៃទី០២ ខែមករា ឆ្នាំ២០២១។

២- ស្ត្រីជនជាតិខ្មែរ អាយុ២៣ឆ្នាំ មានអាសយដ្ឋានស្នាក់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានធ្វើដំណើរមកពីប្រទេសថៃមកដល់កម្ពុជានៅថ្ងៃទី១២ ខែមករា ឆ្នាំ២០២១។

៣- ស្ត្រីជនជាតិខ្មែរ អាយុ៣២ឆ្នាំ មានអាសយដ្ឋានស្នាក់នៅសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បានធ្វើដំណើរមកពីប្រទេសថៃមកដល់កម្ពុជានៅថ្ងៃទី១៣ ខែមករា ឆ្នាំ២០២១។

សូមកត់សម្គាល់ថា ស្ត្រីទាំងបីរូបខាងលើ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន០២លើក ត្រូវបានអនុញ្ញាតឲ្យចេញពីមន្ទីរពេទ្យបង្អែកខេត្តបន្ទាយមានជ័យ។

គិតត្រឹមម៉ោង ៧ និង០០នាទីព្រឹកថ្ងៃទី០៣ ខែកុម្ភៈ ឆ្នាំ២០២១ កម្ពុជាមានអ្នកមានវីរុសកូវីដ១៩ សរុបចំនួន ៤៦៦នាក់(ស្រី១៦២នាក់,ប្រុស៣០៤នាក់) ក្នុងនោះមានអ្នកត្រូវបានព្យាបាលជាសះស្បើយចំនួន ៤៤៧នាក់ (ស្រី ១៥០នាក់, ប្រុស ២៩៧នាក់) អ្នកកំពុងសម្រាកព្យាបាលចំនួន ១៩នាក់(ស្រី ១២នាក់, ប្រុស០៧នាក់) និងមិនមានករណីស្លាប់ទេ៕