កម្ពុជារកឃើញគ្រាប់យុទ្ធភ័ណ្ឌមិនទាន់ផ្ទុះជាង៨តោន ក្នុងនាវាចម្បាំងលិចក្នុងទន្លេ

ដោយ៖ យូ វីរៈ | ថ្ងៃសុក្រ ទី៥ ខែកុម្ភៈ ឆ្នាំ២០២១ |

823

ភ្នំពេញ៖ នាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីន និងជាអគ្គនាយកមជ្ឈមណ្ឌលជាតិរក្សាសន្តិភាព បានបញ្ជាក់ថា គ្រាប់មិនទាន់ផ្ទុះជាង៨តោន ដែលកងកម្លាំងជំនាញបានរុករកឃើញ ក្នុងនាវាចម្បាំងលិចក្នុងបាតទន្លេមេគង្គ នៅសម័យសង្គ្រាមនាឆ្នាំ១៩៧២ នៅស្រុកស្រីសន្ធរ ខេត្តកំពង់ចាម។

គ្រាប់យុទ្ធភ័ណ្ឌទាំងនោះរួមមាន ៖ ប្រភេទគ្រាប់ AK47, គ្រាប់ត្បាល់ ៦០មីល្លីម៉ែត្រ, គ្រាប់ត្បាល់ ៨១មីល្លីម៉ែត្រ, គ្រាប់កាំភ្លើងយន្ត ១២,៧មីល្លីម៉ែត្រ សរុបជាង៥០០កេសធំតូច ។

នាយឧត្តមសេនីយ៍ សែម សុវណ្ណនី បញ្ជាក់ថា រហូតមកដល់ពេលនេះ កម្លាំងជំនាញកំពុងសម្រុកកាន់តែខ្លាំង ដើម្បីស្រង់គ្រាប់ចេញពីបាតទន្លេ ដែលកប់ក្នុងនាវាជាច្រើនតោនទៀត។ បើតាមគ្រោងការណ៍សកម្មភាពរុករកគ្រឿងសម្ភារៈសឹកក្នុងនាវាខាងលើនេះនឹងបញ្ចប់នៅខែឧសភា ឆ្នាំ២០២១ សំដៅឲ្យទាន់មុនរដូវវស្សាមកដល់។ ប៉ុន្តែស្ថានភាពជាក់ស្តែងក្រុមការងារជំនាញពិបាកសន្និដ្ឋាន ព្រោះទំហំនាវានេះ មានទំហំធំ មិនអាចប៉ាន់ប្រមាណបរិមាណទម្ងន់គ្រាប់សរុបនៅក្នុងនាវានោះទេ។

ក្រុមការងារប្រតិបត្តិការបោសសម្អាតគ្រាប់យុទ្ធភ័ណ្ឌមិនទាន់ផ្ទុះ នៅក្រោមផ្ទៃទឹកបានឱ្យដឹងថា ជុំវិញទីតាំងនាវាលិចនេះ មានវិសាលភាពផ្ទៃទំហំ១.០០០ម៉ែត្រ គុណ១.៥០០ម៉ែត្រ នៅតាមបណ្តោយទន្លេប្រមាណ១៥០ហិកតា៕