មេបញ្ជាការកងទ័ពជើងគោកកម្ពុជា-សាធារណរដ្ឋកូរ៉េ ឯកភាពបន្តពង្រឹង និងពង្រីកកិច្ចសហប្រតិបត្តិការ ឱ្យកាន់តែរីកចម្រើនប្រកបដោយផ្លែផ្កា

ដោយ៖ យូ វីរៈ | ថ្ងៃអង្គារ ទី២៣ ខែមីនា ឆ្នាំ២០២១ |

638

ភ្នំពេញ៖ ក្នុងជំនួបពិភាក្សារវាងមេបញ្ជាការកងទ័ពជើងគោកកម្ពុជា និងមេបញ្ជាការកងទ័ពជើងគោកសាធារណរដ្ឋកូរ៉េ បានឯកភាពបន្តពង្រឹង និងពង្រីកកិច្ចសហប្រតិបត្តិការរបស់កងទ័ពជើងគោក នៃប្រទេសទាំងពីរ ឲ្យកាន់តែរីកចម្រើនប្រកបដោយផ្លែផ្កាដោយនឹងខិតខំជំរុញល្បឿន នៃការអនុវត្តកិច្ចការទាំងអស់ឱ្យមានសន្ទុះឡើងវិញ នៅពេលដែលស្ថានភាពនៃជំងឺកូវីដ-១៩ អាចគ្រប់គ្រងបាន។

ជំនួបពិភាក្សានេះបានធ្វើឡើងតបតាមសំណើររបស់សមភាគី នៃសាធារណរដ្ឋកូរ៉េ នៅរសៀលថ្ងៃទី២៣ ខែមីនា ឆ្នាំ២០២១ តាមរយៈប្រព័ន្ធ Video Teleconferencing (VTC) ដោយខាងកម្ពុជាដឹកនាំដោយ ឯកឧត្ដម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ឯខាងភាគីកូរ៉េដឹកនាំដោយនាយឧត្តមសេនីយ៍ Nam Yeongshin មេបញ្ជាការកងទ័ពជើងគោក នៃសាធារណរដ្ឋកូរ៉េថ្មី ដែលទើបឡើងកាន់តំណែង។

ជំនួបពិភាក្សានេះធ្វើឡើងដើម្បីរក្សាការផ្សារភ្ជាប់ទំនាក់ទំនងរវាងកងទ័ពជើងគោក នៃប្រទេសទាំងពីរកម្ពុជា-សាធារណរដ្ឋកូរ៉េ ឱ្យកាន់តែរឹងមាំ និងជិតស្និទ្ធ ជាពិសេសក្នុងស្ថានភាពលំបាក ដែលជំងឺកូវីដ-១៩ នៅកំពុងបន្តរាតត្បាតពិភពលោកនៅឡើយ។

នាយឧត្តមសេនីយ៍ Nam Yeongshin បានសម្តែងនូវការពេញចិត្ត និងអរគុណចំពោះឆន្ទៈរួមក្នុងការបន្តថែរក្សាពូនជ្រំទំនាក់ទំនងកិច្ចសហប្រតិបត្តិការ ដ៏ល្អរវាងកងទ័ពជើងគោក នៃប្រទេសទាំងពីរលើមូលដ្ឋាន និងទិសដៅដែលអតីតមេបញ្ជាការកងទ័ពជើងគោក នៃសាធារណរដ្ឋកូរ៉េ រៀបចំបានផ្តួចផ្តើមជាមួយឯកឧត្ដម ឧត្តមសេនីយ៍ឯក ហ៊ុន ម៉ាណែត ក្នុងរយៈកាលប៉ុន្មានឆ្នាំចុងក្រោយនេះ។

ក្នុងនាមកងទ័ពជើងគោក នៃកងយោធពលខេមរភូមិន្ទ ឯកឧត្ដម ឧត្តមសេនីយ៍ឯក ហ៊ុន ម៉ាណែត បានអរគុណចំពោះការជួយឧបត្ថម្ភគាំទ្ររបស់សមភាគី នៃសាធារណរដ្ឋកូរ៉េ ក្នុងរយៈកាលកន្លងមក និងបានគូសបញ្ជាក់អំពីសារៈសំខាន់ នៃទំនាក់ទំនងមិត្តភាពកិច្ចសហប្រតិបត្តិការ រវាងរដ្ឋាភិបាល កងទ័ព និងប្រជាជនទាំងពីរ ដោយបានសង្កត់ធ្ងន់ផងដែរថា ទោះបីប្រទេសទាំងពីរ ក៏ដូចជាសាកលលោកកំពុងជួបប្រទះនូវការលំបាកបង្កឡើង ដោយជំងឺកូវីដ-១៩ ដែលជាបញ្ហាប្រឈមរួមដ៏ធ្ងន់ធ្ងរនេះ ក៏ដោយក៏ឧបសគ្គនេះ មិនអាចប៉ះពាល់ដល់ការបន្តទំនាក់ទំនងល្អរបស់យើងបានឡើយ គឺយើងនៅតែអាចស្វះស្វែងរិះរកមធ្យោបាយ ដើម្បីរក្សាការភ្ជាប់ទំនាក់ទំនងជាមួយគ្នា គឺដូចអ្វីដែលកំពុងធ្វើតាមប្រព័ន្ធ Video Teleconferencing (VTC) នាពេលនេះ។

គួរបញ្ជាក់ផងដែរថា នៅក្នុងជំនួបនេះ ភាគីទាំងពីរក៏បានចែករំលែក និងផ្លាស់ប្តូរអំពីបច្ចុប្បន្នភាព នៃស្ថានភាពជំងឺកូវីដ-១៩ នៅក្នុងប្រទេសរៀងខ្លួនៗ ព្រមទាំងបទពិសោធន៍របស់កងទ័ពជើងគោកទាំងពីរ ក្នុងការចូលរួមជាមួយរដ្ឋាភិបាល និងប្រជាជន ក្នុងការទប់ស្កាត់ប្រយុទ្ធប្រឆាំងនឹងជំងឺដ៏កាចសាហាវមួយនេះ សម្រាប់ជាការដកពិសោធន៍ និងរៀនសូត្រពីគ្នាទៅវិញទៅមក៕ ប្រភព៖ BTVNews