អ្នកស្ម័គ្រចិត្តចាក់វ៉ាក់សាំងកូវីដ-១៩ លេខរៀងទី៥លាន ទទួលបានអំណោយរបស់សម្តេចតេជោ ហ៊ុន សែន

អ្នកស្ម័គ្រចិត្តចាក់វ៉ាក់សាំងកូវីដ-១៩ លេខរៀងទី៥លាន ទទួលបានអំណោយរបស់សម្តេចតេជោ ហ៊ុន សែន

ភ្នំពេញ​៖ នៅព្រឹកថ្ងៃទី១៤ ខែកក្កដា ឆ្នាំ២០២១ លោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) បាននាំយកជំនួយឧបត្ថម្ភថវិកាចំនួន ១០លានរៀល និងសម្ភារៈឧបភោគបរិភោគមួយចំនួន​ទៀត​ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ទៅប្រគល់ជូនដល់ជ័យលាភីចាក់វ៉ាក់សាំងកូវីដ-១៩ លេខរៀងទី ៥លាន។

អ្នកដែលស្ម័គ្រចិត្តចាក់វ៉ាក់សាំងកូវីដ-១៩ ទី ៥លាន មានឈ្មោះ លោក ណុប មាន អាយុ ៧០ឆ្នាំ ជាកសិករ សព្វថ្ងៃរស់នៅភូមិសែនសំ ឃុំអូរស្វាយ ស្រុកត្រពាំងប្រាសាទខេត្តឧត្តរមានជ័យ។

សូមបញ្ជាក់ជូនថា​ សម្ដេចតេជោ​ ហ៊ុន​ សែន​ នាយករដ្ឋមន្ត្រី ធ្លាប់បាន​ផ្ដល់​ជំនួយឧបត្ថម្ភទឹកប្រាក់​លើកទឹកចិត្តដល់អ្នកចាក់វ៉ាក់សាំង ៤លើករួចមកហើយ​ដោយ​៖ អ្នកចាក់វ៉ាក់សាំងទី១លាន បាន​ទៅលើលោក​ ប៉ាន់ សុវណ្ណរិទ្ធ, អ្នកចាក់វ៉ាក់សាំងទី២លាន បាន​ទៅលើ​កម្មការរិនីរោងចក្រ ទិត ចិន្តា, អ្នកចាក់វ៉ាក់សាំងទី៣លាន បានទៅលើឈ្មោះ លោក​ស្រី ស៊ុ សំអឿន និង​អ្នកចាក់វ៉ាក់សាំងទី៤លាន បានទៅលើឈ្មោះ សូ សយ អាយុ​ ៦៥ឆ្នាំ​ គាត់ជាអតីតយុទ្ធជន៕