សម្ដេចតេជោ ហ៊ុន សែន៖ «សង្គ្រាមងាយបង្កើត តែសន្តិភាពមិនងាយរកបានដោយស្រួលៗនោះទេ»

ដោយ៖ យូ វីរៈ | ថ្ងៃចន្ទ ទី៤ ខែមេសា ឆ្នាំ២០២២ |

550

ភ្នំពេញ៖ ថ្លែងក្នុងឱកាសអញ្ជើញសម្ពោធដាក់ឲ្យប្រើប្រាស់ផ្លូវចំនួន ៣៨ខ្សែ នៅក្នុងក្រុងសៀមរាប នៅព្រឹកថ្ងៃទី០៤ ខែមេសា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានគូសបញ្ជាក់ជាថ្មីថា សង្គ្រាមងាយបង្កើត តែសន្តិភាពមិនងាយនឹងស្វែងរកបានដោយស្រួលៗនោះទេ។

សម្ដេចតេជោបានអំពាវនាវដល់ប្រជាពលរដ្ឋខ្មែរទាំងអស់នៅទូទាំងប្រទេស បន្តនាំគ្នារក្សានូវសុខសន្តិភាពដែលយើងបានប្រឹងប្រែងរកបានដោយលំបាក។ សម្ដេចតេជោ បានរំលឹកពីអតីតកាលនៃសង្គ្រាមស៊ីវិលនៅកម្ពុជា ដោយក្នុងពេលនេះកម្ពុជាមានតំបន់ត្រួតត្រាច្រើន វាគឺជាពេលវេលាដ៏លំបាកបំផុត និងការផ្ទុះអាវុធជារៀងរាល់ថ្ងៃ ដោយបណ្ដាលឲ្យស្លាប់ប្រជាជាពលរដ្ឋជាច្រើន និងបំផ្លាញនូវហេដ្ឋារចនាសម្ព័ន្ធ។

សម្ដេចតេជោមានប្រសាសន៍ថា កុំដល់ពេលមានសង្គ្រាមហើយទើបនាំគ្នាស្វែងរកសន្តិភាព យើងត្រូវរក្សាសន្តិភាពដែលកំពុងមានឲ្យស្ថិតស្ថេរជានិច្ចនិរន្តតរៀងទៅ។ សម្ដេចបានប្រកាសព្រមាន និងប្ដូរផ្ដាច់រក្សាការពារនូវសុខសន្តិភាពនៅកម្ពុជាឲ្យបានគង់វង្ស ហើយសម្ដេចបានបញ្ជាក់ថា នរណាក៏ដោយដែលមានបំណងចង់បំផ្លាញសុខសន្តិភាព ត្រូវតែកម្ទេច និងមិនត្រូវអត់ឱនឲ្យនរណាម្នាក់ឡើយ៕

អត្ថបទទាក់ទង