សេវាដឹកជញ្ជូនសាធារណៈរថយន្តក្រុង(CITY BUS) និងកាណូត បើកដំណើរឡើងវិញហើយចាប់ពីថ្ងៃទី២វិច្ឆិកានេះ
ភ្នំពេញ៖ រដ្ឋាករស្វយ័តដឹកជញ្ជូនសាធារណៈរថយន្តក្រុង (CITY BUS) រាជធានីភ្នំពេញ បានដាក់ឱ្យដំណើរការឡើងវិញ សេវាដឹកជញ្ជូនសាធារណៈរថយន្តក្រុង និងកាណូត ចាប់ពីថ្ងៃទី០២ ខែវិច្ឆិកា ឆ្នាំ២០២១ ហើយការជិះតាមសេវាដឹកជញ្ជូនសាធារណទាំងនេះ នឹងមិនតម្រូវឲ្យបង់ប្រាក់រយៈពេល ៦ថ្ងៃផងដែរ។
ចាប់ពីថ្ងៃទី០២ ខែវិច្ឆិកា ឆ្នាំ២០២១នេះ សេវាដឹកជញ្ជូនសាធារណៈរថយន្តក្រុង និងការណូតនឹងចាប់ផ្ដើមដំណើរការតាមខ្សែរត់ដូចខាងក្រោម៖
១.រថយន្តក្រុង
– ខ្សែទី១៖ ចេញពីស្ថានីយ៍រថយន្តក្រុងព្រែកព្នៅ ដល់ស្ថានីយ៍ចំណតរថយន្តក្រុងវាលស្បូវ
– ខ្សែទី២៖ ចេញពីស្ថានីយ៍រថយន្តក្រុងរង្វង់មូលគួចកាណុង ដល់ស្ថានីយ៍ចំណតរថយន្តក្រុងស្ពានព្រែកសំរោង ក្រុងតាខ្មៅ
– ខ្សែទី៣៖ ចេញពីស្ថានីយ៍រថយន្តក្រុងសួនឫស្សីកែវ ដល់ស្ថានីយ៍ចំណតរថយន្តក្រុងបុរីសន្តិភាព២ តាមមហាវិថីសហព័ន្ធរុស្ស៊ី
– ខ្សែទី៤A៖ ចេញពីស្ថានីយ៍រថយន្តក្រុងសួនឫស្សីកែវ ដល់ស្ថានីយ៍ចំណតរថយន្តក្រុងបុរីសន្តិភាព២ តាមមហាវិថីសហព័ន្ធរុស្ស៊ី
– ខ្សែទី៤B៖ ចេញពីស្ថានីយ៍រថយន្តក្រុងសួនឫស្សីកែវ ដល់ស្ថានីយ៍ចំណតរថយន្តក្រុងបុរីសន្តិភាព២ តាមមហាវិថីចោមចៅ
២. កាណូត៖ ចេញពីស្ថានីយ៍ចំណតសួនឫស្សីកែវ ដល់ស្ថានីយ៍ចំណតក្រុងតាខ្មៅ។
សូមបញ្ជាក់ដែរ រដ្ឋបាលរាជធានីភ្នំពេញ បានអនុញ្ញាតឲ្យជិះសេវាដឹកជញ្ជូនសាធារណៈទាំងនេះដោយមិនបង់ប្រាក់រយៈពេល ៦ថ្ងៃ ចាប់ពីថ្ងៃទី០២ ដល់ថ្ងៃទី៧ខែវិច្ឆិកា ឆ្នាំ២០២១ និងគិតកម្រៃសេវាធម្មតាវិញចាប់ពីថ្ងៃទី០៨វិច្ឆិកាតទៅ លើកលែង ចំពោះព្រះសង្ឃ ចាស់ជរា កុមារកម្ពស់ក្រោម ១ម៉ែត្រ សិស្ស-និស្សិត កម្មករ-កម្មការិនី កីឡាករ-កីឡាការិនី និងគ្រូបង្រៀន។
ចំពោះល័ក្ខខណ្ឌ នៃការជិះរថយន្តក្រុង និងកាណូត អ្នកដំណើរត្រូវគោរពវិធានការសុខាភិបាល ដោយត្រូវបង្ហាញបណ្ណចាក់វ៉ាក់សាំងសម្រាប់មនុស្សពេញវ័យ ពាក់ម៉ាស លាងដៃនឹងអាកុល វ៉ាស់កម្ដៅ ស្កេន QR Code និងអង្គុយតាមកៅអីដែលបានរៀបចំ៕