សម្តេចតេជោ ហ៊ន សែន អំពាវនាវស្វែងរកប្រវត្តិរូបថត ៤សន្លឹក ដែលអាចទាក់ទងដល់ប្រវត្តិស្វែងរកសន្តិភាពកម្ពុជា

ដោយ៖ យូ វីរៈ | ថ្ងៃសុក្រ ទី២៦ ខែសីហា ឆ្នាំ២០២២ |

534

ភ្នំពេញ៖ សម្តេចតេជោ ហ៊ន សែន នាយករដ្ឋមន្ត្រី តាមរយៈហ្វេសប៊ុកនៅព្រឹកថ្ងៃទី២៦ ខែសីហា ឆ្នាំ២០២២នេះ បានប្រកាសអំពាវនាវដល់បងប្អូនជនរួមជាតិទាំងអស់បានដឹងពីប្រភពរូបថត ៤សន្លឹក ដែលសម្ដេចទើបបានទទួលតាមរយៈ Messenger Facebook ថ្មីៗនេះ ដោយសម្ដេចបានបញ្ជាក់ថា រូបថតទាំងនេះអាចទាក់ទងដល់ប្រវត្តិស្វែងរកសន្តិភាព សម្រាប់កម្ពុជា។

សម្តេចតេជោ ហ៊ុន សែន បានសរសេរបណ្តាញសង្គម Facebook ថា “សូមអរគុណចំពោះបងប្អូនដែលបានផ្តល់រូបថតមកឲ្យខ្ញុំ តាមរយៈ Messenger Facebook ។ រូបថតដែលបញ្ជូនមកមានមួយចំនួន ខ្ញុំមិនដែលបានឃើញពីមុន មិនដឹងថា ថតនៅពេលណា នៅទីណា និងអ្នកណាជាអ្នកថត? លើកនេះមានរូបថត៤សន្លឹកដែលខ្ញុំគិតថាថតក្នុងពេលតែមួយដោយសំគាល់ទៅលើអាវ ក្រវ៉ាត់ក និងផ្លាកសញ្ញា សម្រាប់ចូលប្រជុំតែអ្វីដែលមិនច្បាស់ គឺកន្លែង និងពេលវេលា។ ខ្ញុំសង្ស័យ ៥កន្លែង ឬ៥ប្រទេសគឺ៖

១.ការប្រជុំក្រៅផ្លូវការហ្សាកាតា(JIM)ទាំងពីលក១៩៨៨.១៩៨៩ និងការប្រជុំរៀបចំសមាសភាព SNC1991 នៅឥណ្ឌូណេស៊ី។

២.សន្និសិទប៉ារីសចាប់ផ្តើមដំបូង១៩៨៩ នៅប្រទេសបារាំង។

៣.ការប្រជុំបង្កើត SNC នៅតូក្យូប្រទេសជប៉ុន១៩៩០។

៤.ការប្រជុំ SNC នៅបាងកកឬប៉ាតាយ៉ាប្រទេសថៃ១៩៩១។

៥.ការប្រជុំ SNC នៅប៉េកាំងប្រទេសចិន១៩៩១។

ខ្ញុំសូមអំពាវនាវបងប្អូនដែលបានដឹងប្រភពរូបថតនេះជួយប្រាប់ព្រោះរូបថតទាំងនេះ ទាក់ទងដល់ប្រវត្តិស្វែងរកសន្តិភាព សម្រាប់កម្ពុជា”៕