សម្ដេចតេជោ ហ៊ុន សែន នឹងជួបសំណេះសំណាលជាមួយសិស្សនិទ្ទេស A ទូទាំងប្រទេស នៅចុងខែនេះ
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានប្រកាសថា នៅថ្ងៃទី២៨ ខែកុម្ភៈ ឆ្នាំ២០២២ខាងមុខនេះ សម្តេចនឹងជួបសំណេះសំណាលជាមួយសិស្សប្រឡងបាក់ឌុបដែលបាន ជាប់និទ្ទេស Aនៅទូទាំងប្រទេស ហើយសម្តេចក៏បានស្នើឲ្យអាជ្ញាធរខេត្ត ដែលមានសិស្សនិទ្ទេសA ទាំងអស់សម្រួលដល់ការធ្វើដំណើរ និងសម្រាកជូនដល់ពួកគេ និងក្រុមគ្រួសារផងដែរ។
សម្ដេចតេជោ ហ៊ុន សែន បានថ្លែងយ៉ាងដូច្នេះក្នុងឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការកំណាត់ផ្លូវជាតិលេខ៧ ប្រវែងសរុប ៩៣.៥៦គីឡូម៉ែត្រក្នុងខេត្តក្រចេះ នៅថ្ងៃទី០៧ ខែកុម្ភៈ ឆ្នាំ២០២២។
ដើម្បីចូលរួមអបអរសាទរ សម្តេចតេជោ ហ៊ុន សែន នាយករដ្ឋមន្ត្រីបានអនុញ្ញាតឲ្យសិស្សប្រឡងបាក់ឌុបសម្រាប់ឆ្នាំសិក្សា២០២០-២០២១ ដែលបានជាប់និទ្ទេស A ទាំងអស់នៅទូទាំងប្រទេស ចូលជួបសម្ដេចផ្ទាល់ ខណៈក្នុចកិច្ចជំនួបនោះនឹងមានរង្វាន់លើកទឹកចិត្តដល់ពួកគេផងដែរ។
សម្ដេចតេជោ ហ៊ុន សែន ក៏បានប្រាប់ពីមូលហេតុនៃការពន្យាពេលការជួបសិស្សនិទ្ទេស A នៅឆ្នាំនេះផងដែរថា ដោយសារមកពីឆ្នាំនេះសិស្សជាប់និទ្ទេស A មានចំនួនច្រើនរហូតទៅដល់ ១៧០០នាក់ជាង ដូច្នេះក្រុមហ៊ុន ជីបម៉ុង ដែលជាអ្នកឧបត្ថម្ភ IPAD ដល់សិស្សនិទ្ទេស A បញ្ជាទិញមិនទាន់ ទើបមានការពន្យាពេលបែបនេះ៕
សូមបញ្ជាក់ថា បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់ឆ្នាំ២០២០-២០២១កន្លងទៅនេះ មានចំនួន ១១៤.១៨៧នាក់ ហើយបេក្ខជនដែលបានប្រឡងជាប់មានចំនួន ៧២ ០១៦នាក់ស្មើនិង ៦៥,៦៥ភាគរយ ដោយក្នុងនោះបេក្ខជនដែលទទួលបាននិទ្ទេសA មានចំនួន១៧៥៣នាក់៕