សម្ដេចតេជោ ហ៊ុន សែន៖ គណបក្សប្រជាជន គឺជាគណបក្សរួមសុខរួមទុក្ខជាមួយប្រជាពលរដ្ឋជានិច្ច

ដោយ៖ យូ វីរៈ | ថ្ងៃព្រហស្បតិ៍ ទី២២ ខែតុលា ឆ្នាំ២០២០ |

856

បន្ទាយមានជ័យ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា គណបក្សប្រជាជន គឺជាគណបក្សដែលរួមសុខទុក្ខជាមួយនឹងប្រជាពលរដ្ឋជានិច្ច។

សម្ដេចតេជោ ហ៊ុន សែន មានប្រសាសន៍យ៉ាងដូច្នេះក្នុងឱកាសដែលសម្ដេចអញ្ជើញចុះសួរសុខខុក្ខ និងផ្ដល់អំណោយដល់ប្រជាពលរដ្ឋដែលរងគ្រោះដោយទឹកជំនន់នៅខេត្តបន្ទាយមានជ័យ ថ្ងៃទី២២ ខែតុលា ឆ្នាំ២០២០។

សម្ដេចតេជោមានប្រសាសន៍យ៉ាងដូច្នេះថា « និយាយមួយបែប គណបក្សប្រជាជន គឺជាគណបក្សដែលរួមទាំងសុខ និងរួមទាំងទុក្ខ ពាក្យខ្មែរថា “រួមសុខរួមទុក្ខ” តែអ្នកខ្លះរួមតែសុខ ឯពេលមានទុក្ខរត់បាត់ សូម្បីតែពាក្យចូលរួមមរណទុក្ខ សម្ដែងនូវការសោកស្ដាយចំពោះការលិចលង់ក៏គេមិននិយាយផង, តែសម្រាប់គណបក្សប្រជាជន ដែលបានរួមសុខរួមទុក្ខជាមួយប្រជាពលរដ្ឋរបស់យើងក្រោយរបប ប៉ុលពត ជាង ៣១ឆ្នាំ យើងនៅតែបន្តប្រពៃណីនេះទៀត»។

សម្ដេចតេជោបានបន្ថែមថា នៅពេលមានគ្រោះមហន្តរាយកើតឡើង ប្រជាជនជួបការលំបាក តែងតែមានមន្ត្រីគណបក្សប្រជាជនកម្ពុជាចុះជួយប្រជាពលរដ្ឋជានិច្ច។ សម្ដេចតេជោបន្តថា សម្ដេចគ្មានទម្លាប់ដើរចោលប្រជាជន នៅពេលប្រជាជនកំពុងជួបការលំបាកនោះទេ។

សម្ដេចតេជោក៏បានរម្លឹកដែរថា ទឹកជំនន់នៅក្នុងឆ្នាំ២០០០ សម្ដេចបានប្រើពេលចំនួន ៦៨ថ្ងៃ ដោយគ្មានសម្រាក ដើម្បីជួយសង្គ្រោះប្រជាជនរាប់លានគ្រួសារ៕