សម្ដេចក្រឡាហោម អំពាវនាវថ្នាក់ដឹកនាំមន្រ្តីរាជការទាំងអស់ ដែលពាក់ព័ន្ធជាមួយអគ្គនាយកពន្ធនាគារទៅធ្វើតេស្តរកជំងឺកូវីដ១៩

ដោយ៖ យូ វីរៈ | ថ្ងៃអាទិត្យ ទី២៩ ខែវិច្ឆិកា ឆ្នាំ២០២០ |

1,043

ភ្នំពេញ៖ នៅថ្ងៃទី២៩ ខែវិច្ឆិកា ឆ្នាំ២០២០ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវដល់ថ្នាក់ដឹកនាំមន្ត្រីរាជការស៊ីវិល និងនគរបាលជាតិដែលពាក់ព័ន្ធនឹងឯកឧត្ដមអគ្គនាយកពន្ធនាគារ ទាំងផ្ទាល់ និងប្រយោលទៅធ្វើតេស្តរកជំងឺកូវីដ១៩និងអនុវត្តការដាក់ខ្លួនឱ្យនៅដាច់ដោយឡែកដើម្បីតាមដានសុខភាពក្នុងរយៈពេល១៤ថ្ងៃ ឱ្យបានច្បាស់លាស់បំផុត។

សម្ដេចក្រឡាហោម ស ខេង បានលើកឡើងថា ក្រុមគ្រូពេទ្យបានយកសំណាកទៅធ្វើតេស្តរកមេរោគកូវីដ១៩ ក្រោយពេលដែលក្រសួងសុខាភិបាលបានរកឃើញករណីវិជ្ជមានវីរុសកូវីដ១៩ លើឯកឧត្ដម ឧត្ដមអគ្គានុរក្សថ្នាក់លេខ១ ឆែម សាវុធ អគ្គនាយក នៃអគ្គនាយកដ្ឋានពន្ធនាគារ និងសមាជិកក្រុមគ្រួសារមួយចំនួនទៀត នៅថ្ងៃទី២៨ ខែវិច្ឆិកា ឆ្នាំ២០២០។

កាលពីថ្ងៃទី២៤ ខែវិច្ឆិកា ឆ្នាំ ២០២០កន្លងទៅ សម្ដេចក្រឡាហោម ស ខេង បានអញ្ជើញដឹកនាំកិច្ចប្រជុំអន្តរក្រសួង ពិភាក្សាលើសេចក្ដីព្រាងព្រះរាជក្រឹត្យ ស្ដីពីការបន្ធូរបន្ថយទោស និងលើកលែងទោស ដោយមានការចូលរួមពីថ្នាក់ដឹកនាំ និងមន្រ្តីនៃក្រសួងមហាផ្ទៃ ក្រសួងយុត្តិធម៌ និងទីស្ដីការគណៈរដ្ឋមន្រ្តី ។

សម្ដេចក្រឡាហោមមានប្រសាសន៍ថា «នៅក្នុងកិច្ចប្រជុំអន្តរក្រសួងនាថ្ងៃនោះ ឯកឧត្តម ឆែម សាវុធ អគ្គនាយកនៃអគ្គនាយកដ្ឋានពន្ធាគារ ក្រសួងមហាផ្ទៃ ក៏បានចូលរួមដែរ ដោយគាត់បានពាក់ម៉ាស់ ឆ្លងកាត់ការវាស់កំដៅ និងបាញ់អាល់កុលសម្លាប់មេរោគ ដូចរូបខ្ញុំ ព្រមទាំងអ្នកចូលរួមអង្គប្រជុំផ្សេងទៀតដែរ។ ប៉ុន្តែនៅក្នុងអំឡុងពេលប្រជុំនោះ គាត់បានបង្ហើបម៉ាស់ចេញពីមាត់ចំនួន១ដង ដើម្បីមានមតិខ្លីមួយ។ បន្ទាប់ពីបញ្ចប់កិច្ចប្រជុំ ខ្ញុំក៏បានដើរចេញពីបន្ទប់ប្រជុំ ដោយឆ្លងកាត់ពីក្រោយខ្នង ឯកឧត្តម ឆែម សាវុធ ហើយពេលនោះដែរ គាត់ក៏បានក្រោកឈរ និងមានការឆ្លើយឆ្លងគ្នាខ្លីមួយម៉ាត់ពីរ មុនពេលខ្ញុំចាកចេញពីបន្ទប់ប្រជុំ។ »

សម្ដេចក្រឡាហោម ស ខេង បន្ថែមថា ជាការចាំបាច់បំផុតដែលសម្ដេចត្រូវធ្វើចត្តាឡីស័ករយៈពេល ១៤ថ្ងៃ តាមវិធានរបស់ក្រសួងសុខាភិបាល។ សម្ដេចថាទោះបីជាយ៉ាងណាសម្ដេចនៅតែបន្តបំពេញភារកិច្ចពិនិត្យសម្រេចលើសំណើរ និងសំណូមពរនានាពីថ្នាក់ដឹកនាំក្រសួង និងបងប្អូនជនរួមជាតិជាធម្មតា តាមរយៈគេហទំព័រហ្វេសប៊ុករបស់សម្ដេចផ្ទាល់ ពីបន្ទប់ដាច់ដោយឡែកនៅផ្ទះ។

ដោយឡែកចំពោះថ្នាក់ដឹកនាំ មន្រ្តីរាជការ និងនគរបាលជាតិ ដែលមិនមានការជាប់ពាក់ព័ន្ធសូមបន្តបំពេញភារកិច្ចជាធម្មតា ដោយត្រូវប្រកាន់ខ្ជាប់វិធានការអនាម័យ ពាក់ម៉ាស់ លាងដៃ រក្សាគម្លាត ចៀសវាងការប្រមូលផ្ដុំ និងតាមដានសុខភាពជាប្រចាំ។

សម្ដេចក្រឡាហោម ស ខេងក៏បានថ្លែង អរគុណយ៉ាងជ្រាលជ្រៅផងដែរ ចំពោះបងប្អូនជនរួមជាតិទាំងអស់ដែលបានផ្ញើសារជូនពរសម្ដេច ព្រមទាំងក្រុមគ្រួសារ។ សម្ដេចក៏បានជូនពរបងប្អូនជនរួមជាតិទាំងអស់ សូមមានសុខភាពល្អ និងចៀសផុតពីគ្រោះចង្រៃជំងឺកូវីដ-១៩នេះ៕

អត្ថបទទាក់ទង