សម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ថ្លែងអំណរគុណដល់សប្បុរជនចូលរួមឧបត្ថម្ភ គ្រឿងបរិភោគ និងថវិកា ជួយជនរងគ្រោះដោយជំនន់ទឹកភ្លៀង

ដោយ៖ យូ វីរៈ | ថ្ងៃចន្ទ ទី១៩ ខែតុលា ឆ្នាំ២០២០ |

1,262

ភ្នំពេញ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី១៩ ខែតុលា ឆ្នាំ២០២០ ថ្លែងអំណរគុណយ៉ាងជ្រាលជ្រៅចំពោះសប្បុរសជនដែលបានចូលរួមឧបត្ថម្ភនូវគ្រឿងឧបភោគបរិភោគ និងថវិកា សម្រាប់ជួយដល់ពលរដ្ឋរងគ្រោះដោយទឹកជំនន់នៅទូទាំងប្រទេស។

ទី១.ឯកឧត្តម កែវ សុខឃាង និងលោកជំទាវ ដែលបានឧបត្ថម្ភត្រីខ ចំនួន ១.០០០កេស (មួយពាន់កេស) ដែលនេះជាលើកទី២ ដែល ឯកឧត្តម កែវ សុខឃាង និងលោកជំទាវ បានឧបត្ថម្ភជូនកាកបាទក្រហមកម្ពុជា ដើម្បីជួយដល់ប្រជាពលរដ្ឋរងគ្រោះបង្កដោយទឹកជំនន់រហ័សឆ្នាំ២០២០ ដែលលើកទី១ បានឧបត្ថម្ភថវិកាចំនួន ១០០.០០០.០០០រៀល (មួយរយលានរៀល)។

ទី២. លោកជំទាវ សួស ណារ៉ា ហ៊ឹមឆែម និងបុត្រ-ធីតា ព្រមទាំងចៅ ឧបត្ថម្ភ អង្ករ ៥០០គីឡូក្រាម មី ២០កេស ទឹកស៊ីអ៊ីវ ២០យួរ ទឹកត្រី ២០យួរ និងឆៃប៉ូវផ្អែម ៣០គីឡូក្រាម ។

ក្នុងស្ថានភាពគ្រោះទឹកជំនន់រហ័សនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ញេីសារអំពាវនាវដល់បងប្អូនជនរួមជាតិ ៖

១. សូមក្រុមគ្រួសារដែលមានកូនចៅតូចៗ កុំបណ្តែតបណ្តោយឱ្យលេងទឹក ពីព្រោះវាអាចបណ្តាលឱ្យបាត់បង់ជីវិត ដោយសារលង់ទឹកបាន ដូចនេះត្រូវការពារពួកគេឱ្យបានល្អ ជៀសវាងមានវិប្បដិសារីនៅពេលបាត់បង់សមាជិកគ្រួសារដោយសារការធ្វេសប្រហែសនេះ។
២. សូមគិតគូរ និងយកចិត្តទុកដាក់ថែទាំសុខភាពឱ្យបានល្អ និងរក្សាអនាម័យ ព្រោះសុខភាពជាកត្តាចម្បងសម្រាប់យើងគ្រប់គ្នា ដូច្នេះសូមគ្រប់ក្រុមគ្រួសារត្រូវបរិភោគទឹកដាំឆ្អិនល្អ ដើម្បីការពារកុំឱ្យកើតមានជំងឺរាគរូស ឬជំងឺដង្កាត់នានា ដែលធ្វើឱ្យខាតបង់ពេលវេលា និងថវិកាក្នុងការព្យាបាលជំងឺ។
៣. នៅពេលទឹកស្រក មុនពេលត្រឡប់ទៅរស់នៅលំនៅដ្ឋានវិញ សូមសម្អាតផ្ទះ ឬបរិស្ថានជុំវិញផ្ទះឱ្យបានស្អាត មានអនាម័យ និងត្រូវប្រុងប្រយ័ត្នពីសត្វអាសិរពិសដែលវាបានទៅរស់នៅតាមដំបូលផ្ទះឬកន្លែងផ្សេងៗក្នុងផ្ទះរបស់យើង ដែលពួកវាអាចបង្កគ្រោះថ្នាក់ដល់ជីវិត ហេីយសូមបន្តប្រកបរបរចិញ្ចឹមជីវិតដេីម្បីស្តារសេដ្ឋកិច្ចគ្រួសារឡេីងវិញ។
៤. សូមបន្តទប់ស្កាត់ជំងឺកូវីដ-១៩ ត្រូវពាក់ម៉ាស់ លាងដៃនឹងសាប៊ូ និងមានស្មារតីប្រុងប្រយ័ត្នជានិច្ច ដោយអនុវត្តតាមវិធានការនានារបស់ក្រសួងសុខាភិបាល និងទម្លាប់រស់នៅតាមបែបគន្លងថ្មី៕