គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

កម្ពុជា គ្រោងផលិតវ៉ាក់សាំងកូវីដ១៩ ដោយយកប្រភពដើមនៃវ៉ាក់សាំងចេញពីប្រទេសចិន

ដោយ៖ យូ វីរៈ​​ | ថ្ងៃពុធ ទី១៧ ខែវិច្ឆិកា ឆ្នាំ២០២១​ |
កម្ពុជា គ្រោងផលិតវ៉ាក់សាំងកូវីដ១៩ ដោយយកប្រភពដើមនៃវ៉ាក់សាំងចេញពីប្រទេសចិន កម្ពុជា គ្រោងផលិតវ៉ាក់សាំងកូវីដ១៩ ដោយយកប្រភពដើមនៃវ៉ាក់សាំងចេញពីប្រទេសចិន

ភ្នំពេញ៖ សម្ដេចអគ្គមហាសេនាបតីតេជោ​ ហ៊ុន​ សែន​ នាយករដ្ឋមន្ត្រី នៃព្រះរាជាណាចក្រកម្ពុជា បាន​បញ្ជាក់ថា​ កម្ពុជាមានគម្រោង​ផលិតវ៉ាក់សាំងបង្ការជំងឺកូវីដ១៩ ដោយយកប្រភពដើមនៃវ៉ាក់សាំងចេញពីប្រទេសចិន។

សម្ដេចតេជោ​បាន​បញ្ជាក់យ៉ាងដូច្នេះ ក្នុងពិធីទទួលវ៉ាក់សាំងបង្ការជំងឺកូវីដ១៩ ចំនួន​ ២លានដូសបន្ថែមទៀត ពីប្រទេសចិន នៅអាកាសយានដ្ឋានអន្តរជាតិភ្នំពេញ ថ្ងៃទី១៧ ខែវិច្ឆិកា ឆ្នាំ២០២១។

ក្នុងឱកាសនោះដែរសម្តេចតេជោ ហ៊ុន សែន នាយករដ្ឋមន្រ្តីបានបញ្ជាក់ថា ការសម្រេចចិត្តរបស់កម្ពុជា ក្នុងការយកប្រទេស ចិនជាបង្អែកយុទ្ធសាស្រ្តចាក់វ៉ាក់សាំងនោះ គឺបានធ្វើឲ្យប្រទេសកម្ពុជាមានវ៉ាក់សាំងគ្រប់គ្រាន់សម្រាប់ ចាក់ជូនប្រជាជនកម្ពុជារហូតដល់លើសផែនការកំណត់ និងថែមទាំងបានសម្រេចបើកសេដ្ឋកិច្ចប្រទេសឡើងវិញផងដែរ បន្ទាប់ពីបិទអស់រយៈពេលយូរ ដោយសារការរីករាលដាលនៃជំងឺកូវីដ១៩។

សម្ដេចតេជោ​ បាន​លើកឡើងថា​ កិច្ចសហប្រតិបត្តិការក្នុងការផលិតវ៉ាក់សាំងនៅកម្ពុជា ដោយយកប្រភពដើមនៃវ៉ាក់សាំងចេញពីប្រទេសចិន​ ធ្វើឲ្យកម្ពុជាមានលទ្ធភាពទិញវ៉ាក់សាំងដែលបានផលិតនៅក្នុងប្រទេសកម្ពុជាខ្លួនឯង​ផង ក៏អាចចែកចាយវ៉ាក់សាំងទៅប្រទេសដទៃទៀត​ដោយការបញ្ជាទិញផងដែរ​។ តាមរយៈផែនការនេះសម្តេចតេជោរំពឹងថា ទោះបីវិបត្តិកូវីដ-១៩ នៅអូសបន្លាយរាប់ឆ្នាំទៀតក៏ដោយ ក៏យើងមានមូលដ្ឋានគ្រប់គ្រាន់សម្រាប់ទប់ទល់នឹងវិបត្តិនេះបន្តទៀត​ផងដែរ៕

បញ្ចេញមតិ
អត្ថបទទាក់ទង