លោក បាន គីម៉ូនថា ដំណើរ​ទស្សនកិច្ច​របស់​សម្ដេច​តេជោ​ទៅ​កាន់​ប្រទេសមីយ៉ាម៉ា គឺជារឿងដ៏សំខាន់ ក្នុងការស្វែងរកដំណោះស្រាយ បញ្ចប់ជម្លោះ

លោក បាន គីម៉ូនថា ដំណើរ​ទស្សនកិច្ច​របស់​សម្ដេច​តេជោ​ទៅ​កាន់​ប្រទេសមីយ៉ាម៉ា គឺជារឿងដ៏សំខាន់ ក្នុងការស្វែងរកដំណោះស្រាយ បញ្ចប់ជម្លោះ

ភ្នំពេញ៖ លោក បាន គីម៉ូ (Ban Ki-moon) បានលើកឡើងថា ដំណើរទស្សនកិច្ចរបស់​សម្ដេចតេជោ​ទៅ​កាន់ប្រទេសមីយ៉ាម៉ាកន្លងទៅនេះ គឺជារឿងដ៏សំខាន់ ក្នុងការស្វែងរក​ដំណោះស្រាយ បញ្ចប់ជម្លោះនៅប្រទេសមីយ៉ាន់ម៉ា ជាពិសេស លោកគាំទ្រ​ចំពោះការបង្កើត​ឲ្យមានប្រេសិតពិសេសរបស់ប្រធានអាស៊ានក្នុងការរកដំណោះស្រាយនៅមីយ៉ាន់ម៉ានេះ។

លោក បាន គីម៉ូ (Ban Ki-moon) អតីតអគ្គលេខាធិការអង្គការសហប្រជាជាតិ និងជាសហប្រធាន នៃកិច្ចប្រជុំកំពូលសន្តិភាពពិភពលោកឆ្នាំ២០២២ បានលើកឡើងយ៉ាងដូច្នេះ ក្នុងជំនួបពិភាក្សាការងារទ្វេភាគីជាមួយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា  នៅថ្ងៃទី១១ ខែកុម្ភៈ ឆ្នាំ២០២២។

នៅក្នុងកិច្ចពិភាក្សាលក្ខណៈទ្វេភាគីនេះ សម្ដេចតេជោបានសម្តែងនូវក្តីរីករាយដែលបានជួប លោក បាន គីមូន សារជាថ្មីម្ដងទៀត ក្រោយ​ពីលោក​បាន​ចប់​តួនាទី​ជា​អគ្គលេខាធិកាអង្គការសហប្រជាជាតិ។

ក្នុង​ជំនួបនេះ លោក Ban Ki-moon បានមានប្រសាសន៍ថា លោកសង្ឃឹមថា សម្ដេចនឹងមានជំនួបល្អប្រសើរជាមួយនឹងឯកឧត្តមប្រធានាធិបតី Moon Jae-In នៅថ្ងៃរសៀលនេះ ជាពិសេស ឯកឧត្តមសង្ឃឹមថាទំនាក់ទំនងទ្វេភាគីរវាងកម្ពុជា និងកូរ៉េ នឹងមានភាពល្អប្រសើរ និងរីកចម្រើន និងទំនាក់ទំនងកាន់តែល្អប្រសើរបន្ថែមទៀតរវាងកូរ៉េ និងអាស៊ាន។

សម្តេចតេជោនាយករដ្ឋមន្ត្រី ក៏បានអរគុណចំពោះការលើកឡើងរបស់លោក បាន គីមូន និងពិតជារីករាយដែលបានធ្វើជាសហប្រធាន ជាមួយ លោក នៅក្នុងកិច្ចប្រជុំកំពូល​សន្តិភាពពិភពលោកឆ្នាំ២០២២ នេះ។ សម្ដេចតេជោបានមានប្រសាសន៍ថាអង្គការ UPF ពិតជាបានធ្វើការងារនេះដ៏ល្អ និងសំខាន់ ដែលជាយន្តការមួយ​សម្រាប់ការស្វែងរកសន្តិភាពនៅឧបទ្វីបកូរ៉េ។ សម្ដេចតេជោក៏បានមានប្រសាសន៍ទៀតថា អង្គការ UPF បានយកចិត្តទុកដាក់ ក្នុងការប្រមូលយកថ្នាក់ដឹកនាំពិភពលោក បច្ចុប្បន្ន និងអតីតមេដឹកនាំ មកជួបជុំនាពេលនេះគឺជារឿងដែលប្រសើរបំផុត ។ សម្ដេចតេជោ បានមានប្រសាសន៍ទៀតថា យើងគួរតែបន្តធ្វើការរួមគ្នាដើម្បីគាំទ្រ ក្នុងការពង្រឹងសកម្មភាព​របស់អង្គការ UPF នេះ ដែលបានដើរតួនាទីយ៉ាងសំខាន់ក្នុងការស្វែងរកសន្តិភាពនេះ។

នៅក្នុងជំនួបនេះផងដែរ លោក​ បាន គីមូន ក៏មានការផ្លាស់ប្ដូរមតិយោបល់ ក៏ដូចជាការ​រួមចំណែក​ក្នុងការស្វែងរកដំណោះស្រាយក្នុងប្រទេសមីយ៉ាន់ម៉ាផងដែរ ។ លោក​បានមានប្រសាសន៍​ថា លោក​ពិតជាមានការគាំទ្រ នូវតួនាទីដ៏សំខាន់សម្រាប់អាស៊ាន ជាពិសេស ការឯកភាពរបស់អាស៊ាន ហើយលោក​បានគាំទ្រ​ចំពោះសម្តេចតេជោ​ជាប្រធានអាស៊ាន​ក្នុងឆ្នាំ២០២២ នេះ ។ លោកបានមានប្រសាសន៍ថា ដំណើរទស្សនកិច្ចរបស់​សម្ដេចតេជោ​ទៅកាន់​ប្រទេសមីយ៉ាម៉ាកន្លងទៅនេះ គឺជារឿងដ៏សំខាន់ ក្នុងការស្វែងរកដំណោះស្រាយ បញ្ចប់ជម្លោះនៅប្រទេសមីយ៉ាន់ម៉ា ជាពិសេស លោក​គាំទ្រ​ចំពោះ​ការបង្កើត​ឲ្យ​មានប្រេសិត​ពិសេសរបស់​ប្រធានអាស៊ានក្នុងការរកដំណោះស្រាយនៅមីយ៉ាន់ម៉ានេះ៕