សម្តេចតេជោ ហ៊ុន សែន ថ្លែងបញ្ជាក់ថា ច្បាប់កំណត់សញ្ជាតិខ្មែរតែមួយ សម្រាប់ថ្នាក់ដឹកនាំស្ថាប័នកំពូលៗ គឺដើម្បីបញ្ចៀសការជ្រៀតជ្រែកពីបរទេស

ដោយ៖ យូ វីរៈ | ថ្ងៃសុក្រ ទី៨ ខែតុលា ឆ្នាំ២០២១ |

880

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី០៨ ខែតុលា ឆ្នាំ២០២១នេះ បានអញ្ជើញដឹកនាំអង្គប្រជុំគណៈរដ្ឋមន្ត្រី អនុម័តសេចក្តីព្រាងវិសោធនកម្មរដ្ឋធម្មនុញ្ញ ដើម្បីកំណត់សញ្ញាតិមេដឹកនាំស្ថាប័នកំពូលទាំង៤ «នាយករដ្ឋមន្ត្រី ប្រធានព្រឹទ្ធសភា ប្រធានរដ្ឋសភា និងប្រធានក្រុមប្រឹក្សាធម្មនុញ្ញ» មានសញ្ជាតិខ្មែរតែមួយគត់។

សម្ដេចតេជោ ហ៊ុន សែន បានបញ្ជាក់ថា ការធ្វើវិសោធនកម្មរដ្ឋធម្មនុញ្ញ និងច្បាប់ពាក់ព័ន្ធនានា ដោយកំណត់ឲ្យថ្នាក់ដឹកនាំកំពូលៗទាំង៤របស់ជាតិ ត្រូវតែមានសញ្ជាតិខ្មែរតែមួយ គឺដើម្បីបញ្ចៀសការជ្រៀតជ្រែកពីបរទេសចូលមកក្នុងកិច្ចការប្រទេសកម្ពុជា ដែលសម្ដេចមើលឃើញថា នេះគឺជាផលប្រយោជន៍រយៈពេលវែងសម្រាប់កម្ពុជា។

សម្ដេចតេជោ ហ៊ុន សែន មានប្រសាសន៍ថា៖ «វាមានផលប្រយោជន៍រយៈពេលវែងសម្រាប់ប្រទេសកម្ពុជា ដើម្បីបញ្ចៀសនូវការជ្រៀតជ្រែកពីបរទេស និងបង្ហាញភក្ដីភាពចំពោះជាតិមាតុភូមិ។ ហេតុអ្វីមិនហ៊ានយកសញ្ជាតិតែមួយ ហើយមកចង់ដណ្ដើមយកកៅអីហើយកន្លែងនេះ វាមានទំនាស់ផលប្រយោជន៍»។

សម្ដេចតេជោ ហ៊ុន សែន មានប្រសាសន៍បន្តថា៖ «ការជ្រៀតជ្រែកពីបរទេសទៅលើតំណែងដ៏សំខាន់នេះ គឺវាអាចកើតមានច្បាស់ ព្រោះអ្នកមានសញ្ជាតិពីរត្រូវបង់ពន្ធឱ្យក្រៅប្រទេស។ អ៊ីចឹងទេ គេអាចកំឡាថា បើសិនមិនធ្វើតាមគេ ទ្រព្យសម្បត្តិរបស់អ្នកឯងនៅក្រៅប្រទេស គេនឹងរឹបអូស ឬធ្វើស្អីៗអ៊ីចឹងទៅ។ ដូច្នេះ វានៅក្រោមឥទ្ធិពលគេ។»។

សម្ដេចតេជោ ហ៊ុន សែន បញ្ជាក់បន្ថែមថា នៅពេលសំណើកែប្រែមាត្រាមួយចំនួននៃរដ្ឋធម្មនុញ្ញនេះចូលជាធរមានហើយ អ្នកនយោបាយមានសញ្ជាតិពីរ ដែលប៉ុនប៉ងប្រកួតប្រជែងសម្រាប់តំណែងដឹកនាំស្ថាប័នកំពូលទាំងបួននេះ នឹងត្រូវបញ្ចប់ជាស្ថាពរ។

នៅក្នុងកិច្ចប្រជុំគណៈរដ្ឋមន្ត្រី នៅព្រឹកថ្ងៃនេះដែរ ក៏ពិនិត្យទៅលើសេចក្តីព្រាងច្បាប់ ស្តីពីភាពជាដៃគូរវាង រដ្ឋ និងឯកជន និងបញ្ហាផ្សេងៗ សំណើសុំការយល់ព្រមពីគណៈរដ្ឋមន្ត្រី ដើម្បីសុំការអនុម័តពីស្ថាប័ន នីតិប្បញ្ញត្តិលើសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងបន្ថែមទៅលើកិច្ចព្រមព្រៀង រវាងរាជរដ្ឋាភិបាលកម្ពុជា និងអង្គការសហប្រជាជាតិ ទាក់ទងទៅនឹងការកាត់សេចក្ដីនៅក្រោមច្បាប់កម្ពុជា នូវឧក្រិដ្ឋកម្ម ដែលប្រព្រឹត្តឡើងនៅក្នុងរយៈកាលនៃកម្ពុជាប្រជាធិបតេយ្យ ស្តីពីការរៀបចំក្នុងពេលអន្តរ កាល និងការបញ្ចប់ការងាររបស់អង្គជំនុំជម្រះវិសាមញ្ញ។ ចំណែកសេចក្ដីព្រាងកម្មវិធីវិនិយោគសាធារណៈ ៣ឆ្នាំរំកិល ២០២២-២០២៤ មិនត្រូវបានលើកមកពិភាក្សាទេ គឺទុកទៅពេលក្រោយ៕

សូមស្ដាប់ប្រសាសន៍សម្ដេចតេជោពាក់ព័ន្ធនឹងការធ្វើវិសោធនកម្មរដ្ឋធម្មនុញ្ញ និងច្បាប់កំណត់ឲ្យមានសញ្ជាតិខ្មែរតែមួយ ខាងក្រោមនេះ៖

អត្ថបទទាក់ទង