សម្ដេចតេជោ ហ៊ុន​ សែន​ ប្រកាសផ្ដល់ថវិកាលើកទឹកចិត្តចំនួន ១០លានរៀល ដល់​អ្នកចាក់វ៉ាក់សាំង​ទី២លាន

សម្ដេចតេជោ ហ៊ុន​ សែន​ ប្រកាសផ្ដល់ថវិកាលើកទឹកចិត្តចំនួន ១០លានរៀល ដល់​អ្នកចាក់វ៉ាក់សាំង​ទី២លាន

ភ្នំពេញ​៖ តាមរយៈហ្វេសប៊ុកសម្ដេចតេជោ ហ៊ុន​ សែន​ នាយករដ្ឋមន្ត្រី នៃកម្ពុជានៅថ្ងៃទី​១៤ ខែឧសភា ឆ្នាំ២០២១នេះ សម្ដេច​បាន​ផ្ដល់ថវិកាលើកទឹកចិត្ត ដល់អ្នកបានចាក់វ៉ាក់សាំងទី២លាន ចំនួន ១០លានរៀល ដែលបានទៅកម្មការិនីរោងចក្រឈ្មោះ ទិត ចិន្តា អាយុ​២៣ឆ្នាំ។

នេះជាលើកទី២ ដែលសម្ដេចតេជោ​ បាន​ផ្ដល់​ថវិកាលើកទឹកចិត្តដល់អ្នកដែលបាន​ទៅចាក់វ៉ាក់សាំងប្រឆាំងកូវីដ១៩ ដែលើកទី១ បាន​ទៅលើលោក​ ប៉ាន់ សុវណ្ណរិទ្ធិ ចំនួន​ ១០លានរៀលដែរនោះ។

សម្ដេចតេជោ​ បានសរសេរតាមរយៈហ្វេសប៊ុកដូច្នេះថា «បន្ទាប់ពីការចាប់ផ្តើមចាក់វ៉ាក់សាំងថ្ងៃ១០ ខែ កុម្ភៈ ២០២១ ដែលម្ជុលទី១បានទៅ ហ៊ុន ម៉ាណែត។

ថ្ងៃ១១ ខែ មេសា ២០២១ យើងបានរកឃើញមនុស្សទី១លានដែលបានចាក់វ៉ាក់សាំងដែលបានទៅក្មួយ ប៉ាន់ សុវណ្ណរិទ្ធិ ដែលទទួលបានរង្វាន់១០លានរៀលផងដែរ។

ថ្ងៃនេះ១៤ ខែ ឧសភា ២០២១ យើងរកឃើញមនុស្សទី២លាន ដែលបានទៅក្មួយស្រី ទិត ចិន្តា អាយុ ២៣ឆ្នាំ ជាកម្មការរិនីរោងចក្រដែលនឹងទទួលបានរង្វាន់លើកទឹកចិត្តចំនួនទឹកប្រាក់១០លានរៀលទៀត។ សូមក្មួយស្រី ទិត ចិតា្តទទួលយករង្វាន់ពី លោកជំទាវ ឱ វណ្ណឌីន ប្រធានគណៈកម្មការចំពោះកិច្ចលើការចាក់វ៉ាក់សាំង។

ក្នុងយុទ្ធសាស្ត្រពន្លត់ភ្លើង​ ល្អជាងអង្គុយបក់ផ្សែង យើងគ្មានជម្រើសណាអោយល្អជាងការខិតខំស្វែងរកវ៉ាក់សាំងចាក់ជូនប្រជាជនយើងនោះទេ។ ការឆ្លងក្នុងសហគមន៍ម្តងហើយម្តងទៀតនៅស្ទើរគ្រប់ប្រទេសតម្រូវអោយយើងខិតខំរកវិធីទប់ស្កាត់ការឆ្លងនិងការបាត់បង់ជីវិតប្រជាជនយើងតាមរយៈការចាក់វ៉ាក់សាំង។

ក្នុងចំណោមប្រជាជនទាំងចាស់ទាំងក្មេង១៦លាននាក់ មានប្រជាជនដែលមានអាយុ១៨ឆ្នាំឡើងដែលនឹងត្រូវចាក់វ៉ាក់សាំងតែ១០លាននាក់ប៉ុណ្ណោះដែលថ្ងៃនេះយើងចាក់បាន២លាននាក់

ស្មើរនឹង២០ភាគរយរួចទៅហើយ។ ការចាក់វ៉ាក់សាំងនេះយើងក៏បាននិងកំពុងអនុវត្តយុទ្ធសាស្ត្រផ្ការីក គឺចាក់ពីក្នុងចេញក្រៅ គឺចាក់នៅរាជធានីភ្នំពេញដែលមានមនុស្សរស់នៅកុះករជាមុន បន្ទាប់ទៅនឹងចេញទៅបណ្តាខេត្តទៅតាមលំដាប់អាទិភាព។

សូមបងប្អូនកុំបារម្ភ រាជរដ្ឋាភិបាលនឹងចាក់ជូនគ្រប់ៗគ្នាគ្រាន់តែមុននិងក្រោយប៉ុណ្ណោះ៕»