សម្ដេចតេជោ ហ៊ុន សែន ប្រកាសឧបត្ថម្ភថវិកា១០លានរៀល ជូនគ្រួសារសពដែលលង់ទឹកស្លាប់ចំនួន ២០នាក់
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅល្ងាចថ្ងៃទី១៧តុលានេះ បានប្រកាសផ្ដល់ថវិកាជូនគ្រួសារសពដែលលង់ទឹកស្លាប់សរុប២០នាក់ ដោយសារជំនន់ទឹកភ្លៀង ដោយមួយគ្រួសារទទួលបានថវិកា ១០លានរៀល។
លោក សេង ទៀង ជំនួយការផ្ទាល់សម្តេចតេជោ និងជារដ្ឋលេខាធិការទីស្តីការគណៈរដ្ឋមន្រ្តី បានប្រាប់លោក លឹម ជាវុត្ថា នាយកប្រតិបត្តិការបណ្តាញព័ត៌មាន Fresh News ថា ក្រោយទទួលបានព័ត៌មានពីជនរងគ្រោះស្លាប់ដោយសារជំនន់ទឹកភ្លៀងនោះ នៅពេលនេះសម្តេចតេជោ បានឧបត្ថម្ភជូនគ្រួសារសពទាំង២០នាក់ ដោយមួយគ្រួសារសពទទួលបាន ១០លានរៀល និងបានផ្តល់ថវិកាចំនួន ១០ម៉ឺនដុល្លារបន្ថែមទៀតជូន រដ្ឋបាលខេត្តបន្ទាយមានជ័យ ដែលរងគ្រោះខ្លាំងជាងគេដោយសារជំនន់ទឹកភ្លៀង។
លោក សេង ទៀង បានបញ្ជាក់ថា ក្រោយទទួលបានបទបញ្ជារបស់សម្តេចតេជោ ហ៊ុន សែន ភ្លាមលោកបាននិងកំពុងចាត់ចែងថវិកាទាំងនេះទៅកាន់គ្រួសារសព និងរដ្ឋបាលខេត្តបន្ទាយមានជ័យ។
សូមបញ្ជាក់ថា យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយនៅថ្ងៃទី១៧ ខែតុលា ឆ្នាំ២០២០នេះ បានឱ្យដឹងថា ជំនន់ទឹកភ្លៀង បានប៉ះពាល់ ១៩រាជធានី-ខេត្ត ស្មើនឹង ៧១ក្រុង/ស្រុក/ខណ្ឌ និងបណ្តាលឱ្យមនុស្ស ២០នាក់ហើយ បានស្លាប់បាត់បង់ជីវិត និងប៉ះពាល់ប្រជាពលរដ្ឋជាង ២៤ម៉ឺននាក់។ ប្រភព៖ FreshNews