សម្តេចតេជោ ហ៊ុន សែន បន្តផ្តល់ថវិកា និងឃីតបន្ថែមទៀតឱ្យខេត្តជាប់ព្រំដែនកម្ពុជា-ថៃ និងវៀតណាម ដើម្បីរៀបចំធ្វើចត្តាឡីស័ក ដល់ពលរដ្ឋខ្មែរ

ដោយ៖ យូ វីរៈ | ថ្ងៃសៅរ៍ ទី១៣ ខែមីនា ឆ្នាំ២០២១ |

1,281

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា កាលពីថ្ងៃទី១១ ខែមីនា ឆ្នាំ២០២១ បានផ្តល់ជំនួយថវិកាជាង១៥០០លានរៀល និងសម្ភារៈដល់បណ្តាខេត្តមួយចំនួន ដែលនៅជាប់ព្រំដែនកម្ពុជា ដូចជាថៃ និងវៀតណាម បន្ថែមទៀត ដើម្បីរៀបចំធ្វើចត្តាឡីស័ក ដល់ពលរដ្ឋខ្មែរដែលវិលត្រឡប់ពីប្រទេសទាំងពីរនេះ។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានសម្រេចផ្គត់ផ្គង់នូវសម្ភារ បរិក្ខារ និងថវិកាជាង១៥០០លានរៀលបន្ថែមទៀត ទៅបណ្តាខេត្តជាប់ព្រំដែនកម្ពុជា-ថៃ និងវៀតណាម ចំនួន១១ខេត្ត ដើម្បីដោះស្រាយដល់ប្រជាពលរដ្ឋ ពលករខែ្មរយើង ត្រឡប់ពីប្រទេសថៃ រៀបចំចាត់ចែងធ្វើចត្តាឡីស័ក។

បើតាមការបញ្ជាក់របស់លោកជំទាវ វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានឲ្យដឹងថា ដោយទទួលបានការយកចិត្តទុកដាក់ខ្ពស់ពីសម្តេចតេជោ ហ៊ុន សែន បានឲ្យរៀបចំសម្ភារៈឃីត និងថវិកា ជូនទៅបណ្តាខេត្តជាប់ព្រំដែនប្រទេសកម្ពុជា-ថៃ និងវៀតណាម សម្រាប់ត្រៀមពីថ្ងៃទី១០ រហូតដល់ថ្ងៃទី២០ ខែមីនា ឆ្នាំ២០២១។លោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល ចំពោះថវិកា និងសម្ភារៈនេះយើងបានផ្ទេរទៅសព្វគ្រប់អស់ហើយ និងបានទៅដល់គ្រប់គោលដៅអស់ហើយ។

ខេត្តជាប់ព្រំដែនកម្ពុជា-ថៃ មានចំនួន០៥ខេត្ត គឺខេត្តបាត់ដំបង ទទួលបានថវិកា ១០០លានរៀល, ខេត្តបន្ទាយមានជ័យ ទទួលបានថវិកា ៥០០លានរៀល, ខេត្តឧត្តរមានជ័យ ទទួលបានថវិកា ៤០០លានរៀល, ខេត្តប៉ៃលិន ទទួលបានថវិកា ២៥០លានរៀល និងខេត្តពោធិ៍សាត់ ទទួលបានថវិកា ១០០លានរៀល សរុបថវិកាទាំងអស់ ១,៣៥០,០០០,០០០រៀល (មួយពាន់បីរយហាសិបលានរៀល)។
ខេត្តជាប់ព្រំដែនកម្ពុជា-វៀតណាម មានចំនួន៦ខេត្ត និងអ្នកកំពុងធ្វើចត្តាឡីស័ក មានចំនួនសរុប២,១១១នាក់ គឺខេត្តកណ្តាល ទទួលបានថវិកា ៣០លានរៀល និងសម្ភារៈឃីត១០០, ខេត្តស្វាយរៀង ទទួលបានថវិកា១០លានរៀល និងសម្ភារៈឃីត១០០, ខេត្តព្រៃវែង ទទួលបានថវិកា៨០លានរៀល និងសម្ភារៈឃីត៣០០, ខេត្តត្បូងឃ្មុំ ទទួលបានថវិកា ៤០លានរៀល និងសម្ភារៈឃីត៣០០, ខេត្តក្រចេះ ទទួលបានថវិកា២០លានរៀល និងសម្ភារៈឃីត១០០, ខេត្តតាកែវ ទទួលបានថវិកា២០លានរៀល និងខេត្តរតនៈគីរី ទទួលបានសម្ភារៈឃីត១០០ សរុបថវិកាទាំងអស់ ២០០,០០០,០០០រៀល (ពីររយលានរៀល) និងសរុបសម្ភារៈឃីត ១០០០ផងដែរ៕