សម្ដេចតេជោ ហ៊ុន សែន ប្រកាសផ្ដល់ជំនួយឧបត្ថម្ភនូវទឹកប្រាក់ចំនួន ១០លានរៀលដល់លោកស្រី ស៊ុ សំអឿន (អ្នកបានចាក់វ៉ាក់សាំងទី៣លាន)

ដោយ៖ យូ វីរៈ | ថ្ងៃចន្ទ ទី១៤ ខែមិថុនា ឆ្នាំ២០២១ |

1,276

ភ្នំពេញ៖ តាមរយៈសារនៅលើបណ្ដាញសង្គមហ្វេសប៊ុក នៅយប់ថ្ងៃទី១៤ ខែមិថុនា ឆ្នាំ២០២១នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជាបានប្រកាសផ្ដល់ជំនួយឧបត្ថម្ភទឹកប្រាក់ចំនួន ១០លានរៀលដល់ លោកស្រី ស៊ុ សំអឿន ដែលលោកស្រី គឺជាអ្នកបានចាក់វ៉ាក់សាំងទី៣លាន។

សម្ដេចតេជោ បានសរសេរដូច្នេះថា “គិតត្រឹមល្ងាចថ្ងៃ១៤ ខែ មិថុនា ២០២១ នេះ យើងចាក់វ៉ាក់សាំងបានជាង៣លាននាក់។ ក្នុងនោះយើងបានរកឃើញបុគ្គលដែលបានចាក់វ៉ាក់សាំងទី៣លាន គឺប្អូនស្រី ស៊ុ សំអឿន អាយុ៤៨ឆ្នាំ ជាស្ត្រីមេម៉ាយរស់នៅមន្ទីរពេទ្យជ័យជំនះខេត្តកណ្តាល។”

សម្ដេចតេជោ បន្តទៀតថា ដូចមុនៗដែរ សម្រាប់មនុស្សទី១លាន មនុស្សទី២លាន ប្អូនស្រី ស៊ុ សំអឿន នឹងទទួលបានជំនួយឧបត្ថម្ភនូវទឹកប្រាក់ចំនួន ១០លានរៀល ហើយថវិកានោះ លោកជំទាវ ឱ វណ្ណឌីន រដ្ឋលេខាធិការក្រសួងុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងក្នុងក្របខណ្ឌទូទាំងប្រទេស នឹងយកទៅជូនផ្ទាល់នាថ្ងៃទី១៥មិថុនាឆ្នាំ២០២១នេះ។

សម្ដេចតេជោ ហ៊ុន សែន បានបញ្ជាក់ដែរថា កម្ពុជាសម្រេចបាននូវការចាក់វ៉ាក់សាំងចំនួន ៣០ភាគរយនៃចំនួនដែលត្រូវចាក់ ដែលនេះជាជោគជ័យដ៏ធំក្នុងដំណើរឆ្ពោះទៅរកគោលដៅ ១០លាននាក់ដែលត្រូវចាក់។

សូមបញ្ជាក់ជូនថា សម្ដេចតេជោ ហ៊ុន សែន នាយករដ្ឋមន្ត្រី ធ្លាប់បានផ្ដល់ជំនួយឧបត្ថម្ភទឹកប្រាក់លើកទឹកចិត្តដល់អ្នកចាក់វ៉ាក់សាំង ពីរលើករួចមកហើយដោយ៖ អ្នកចាក់វ៉ាក់សាំងទី១លាន បានទៅលើលោក ប៉ាន់ សុវណ្ណរិទ្ធ និងអ្នកចាក់វ៉ាក់សាំងទី២លាន បានទៅលើឈ្មោះ ទិត ចិន្តា អាយុ ២៣ឆ្នាំ ជាកម្មការរិនីរោងចក្រ៕