គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

    សម្ដេចពញាចក្រី ហេង សំរិន​ ចូលរួម​រំលែកមរណៈទុក្ខជាមួយគ្រួសារពលរដ្ឋ​បាត់​បង់​ជីវិត​ដោយ​សារ​ជំងឺ​កូវីដ១៩

    ដោយ៖ យូ វីរៈ​​ | ថ្ងៃអាទិត្យ ទី២១ ខែមីនា ឆ្នាំ២០២១​ |
    សម្ដេចពញាចក្រី ហេង សំរិន​ ចូលរួម​រំលែកមរណៈទុក្ខជាមួយគ្រួសារពលរដ្ឋ​បាត់​បង់​ជីវិត​ដោយ​សារ​ជំងឺ​កូវីដ១៩ សម្ដេចពញាចក្រី ហេង សំរិន​ ចូលរួម​រំលែកមរណៈទុក្ខជាមួយគ្រួសារពលរដ្ឋ​បាត់​បង់​ជីវិត​ដោយ​សារ​ជំងឺ​កូវីដ១៩

    ភ្នំពេញ៖ តាមរយៈហ្វេសប៊ុកសម្ដេចពញាចក្រី ហេង​ សំរិន​ ប្រធានរដ្ឋសភា និង​សម្ដេច​ធម្មវិសុទ្ធវង្សា សៅ ទី ហេង សំរិន ចូលរួមរំលែកមរណៈទុក្ខជាមួយគ្រួសារ​ពលរដ្ឋ​ដែលបាត់បង់ជីវិត​ដោយសារជំងឺកូវីដ១៩ ខណៈមានពលរដ្ឋ ៣នាក់​បានស្លាប់ និង​អត្រាឆ្លង​បាន​កើនឡើង​ជាលំដាប់ពី​មួយ​ថ្ងៃទៅមួយថ្ងៃ ករណីវិជ្ជមាន​បាន​រកឃើញ​នៅលើ​មនុស្ស​គ្រប់វ័យ មិនប្រកាន់ថាជាមនុស្សចាស់ ឬក្មេង​នោះឡើយ​។

    សម្ដេច​ពញាចក្រី ហេង សំរិន​ អំពាវនាវ​ដល់​ជនរួមជាតិ​បន្ថែម​ការ​ប្រុងប្រយ័ត្ន​នៅក្នុង​ការការ​ពារ​និង​ទប់ស្កាត់ជំងឺកូវីដ១៩ ក្នុងខណៈដែលមាន​ការ​រីក​រាល​ដាល​ នៃជំ​​ងឺ​កូវីដ​១៩​ កំពុង​បង្ក​ហានិភ័យ​ខ្ពស់​បំផុត​ដល់​យើង​គ្រប់គ្នា នៅគ្រប់ពេលវេលា គ្រប់ទីកន្លែង។ បន្ថែមលើសពីនេះ សម្ដេច​​ពញាចក្រី ស្នើ​ឲ្យ​បង​ប្អូន​កូន​ក្មួយ​ទាំងអស់គ្នា ចូល​រួម​បំពេញ​កាតព្វកិច្ច​ជា​ពលរដ្ឋ​ល្អ​ឱ្យ​បាន​គ្រប់​ៗគ្នា ដោយប្រកាន់ឱ្យខ្ជាប់រាល់វិធានការណ៍របស់ក្រសួងសុខាភិបាលបានដាក់ចេញ ពិសេស​ចូល​រួម​អនុវត្តច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺ​ឆ្លង​កាច​សាហាវ ​និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលយើងទើបអនុវត្តថ្មីនេះៗ ឱ្យ​បាន​ទាំង​អស់​គ្នា​។ មានតែការចូលរួមរបស់យើងទាំងអស់គ្នាប៉ុណ្ណោះ ទើបអាចថែរក្សាសុខភាពខ្លួនឯង សុខភាព​គ្រួសារ និងសង្គមជាតិរបស់យើងបាន។

    ឆ្លៀតឱកាសនេះដែរ​ សម្ដេចពញាចក្រី សូម​ជូនពរ​ដល់​ប្រជាពលរដ្ឋ​ដែល​កំពុង​សម្រា​ក​ព្យាបាល​ជំងឺ​កូវីដ​១៩ នៅតាមមន្ទីរ​ពេទ្យ​នា​នា​សូម​ឱ្យ​បាន​ឆាប់​ជា​សះស្បើ​យនឹ​ង​បាន​វិល​ទៅ​ជួបជុំ​ក្រុម​គ្រួសារ​វិញ​។

    ជាមួយគ្នា​នេះដែរ សម្ដេចពញាចក្រី ក៏បាន​ថ្លែងនូវ​ការ​កោតសរសើរជាថ្មី ចំពោះរាជរដ្ឋាភិបាល កងកំលាំង អាជ្ញាធរគ្រប់ជាន់ថ្នាក់ ពិសេសពលីកម្មដ៏ធំធេងរបស់ក្រុមគ្រូពេទ្យអាវស ដែលជា​កម្លាំង​ជួរ​មុខបានខិតខំប្រឹង​ប្រែង​អស់ពីកំលាំង កាយចិត្តនៅក្នុងការប្រយុទ្ធប្រឆាំងជំងឺកូវីដ-១៩ ទាំង​ថ្ងៃ​ទាំងយប់ ក្នុងបេសកកម្មមនុស្សធម៌ដ៏ថ្លៃថ្លាមិនអាចកាត់ថ្លៃបាន នៅ​ក្នុង​ការ​ថែ​រក្សា​ការពារ​សុខមាលភាព​ប្រជាពលរដ្ឋយើង។

    សូមឱ្យកម្ពុជាយើង ក៏​ដូច​ជា​ពិភព​លោក​ទាំង​មូល​បានរួ​ច​ចាក​ផុត​ពី​ជំងឺដ៏កាចសាហាវនេះ ក្នុង​ពេល​ឆាប់​ៗ​នេះ។​ សូម​ជន​រួម​ជាតិ​ទាំង​អស់​បាន​ប្រកប​តែ​សុច​ក្តីសុខ​ និង​សុភមង្គល គ្រប់​ក្រុម​គ្រួសារ​៕

     

    ពាក្យគន្លឹះទាក់ទង
    អត្ថបទទាក់ទង