សម្ដេចតេជោ ហ៊ុន សែន នឹងបញ្ចេញរឿងសម្ងាត់មួយចំនួនក្នុងការដឹកនាំប្រទេសក្នុងសៀវភៅថ្មី មួយក្បាល មាន៦០១ទំព័រ

ដោយ៖ យូ វីរៈ | ថ្ងៃព្រហស្បតិ៍ ទី១៥ ខែកញ្ញា ឆ្នាំ២០២២ |

402

ភ្នំពេញ៖ តាមរយៈហ្វេសប៊ុក នៅថ្ងៃទី១៥ ខែកញ្ញា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រី បានប្រកាសថា សម្ដេចនឹងបញ្ចេញនូវរឿងរ៉ាវសម្ងាត់មួយចំនួនក្នុងការដឹកនាំប្រទេសកម្ពុជា ដែលមនុស្សភាគច្រើនមិនបានដឹង ក្នុងសៀវភៅថ្មីមួយក្បាលមានប្រមាណ ៦០១ទំព័រ។

សម្ដេចតេជោ ហ៊ុន សែន បញ្ជាក់ថា សៀវភៅនេះបញ្ចេញនូវរឿងសម្ងាត់ប្រមាណ ៧០ ទៅ ៨០ភាគរយដែលមនុស្សភាគច្រើនមិនបានដឹងដែលសម្ដេចយល់ថាចាំបាច់ត្រូវបញ្ចេញឱ្យដឹងនាពេលនេះ។ សម្ដេចបន្ថែមថា សម្ដេចនឹងឲ្យបោះពុម្ភសៀវភៅនេះចំនួន៥ម៉ឺនច្បាប់ និងឲ្យមានការបកប្រែជាភាសាអង់គ្លេស ដើម្បីឲ្យមិត្តភ័ក្របរទេសបានអានផងដែរ។

សម្ដេចតេជោ បានសរសេរលើបណ្ដាញសង្គមហ្វេសប៊ុកយ៉ាងដូច្នេះថា “ ដល់ពេលដែលត្រូវបញ្ចេញនូវរឿងរ៉ាវមួយចំនួនដែលមនុស្សភាគច្រើនមិនបានដឹង។ ឯកឧត្តម កែវ បាភ្នំ ប្រធានគណៈស្រាវជ្រាវប្រវត្តិសាស្រ្តគណបក្សប្រជាជន និងជារដ្ឋមន្ត្រីប្រតិភូអមនាយករដ្ឋមន្ត្រីបានសរសេរសៀវភៅមួយក្បាលដែលមានចំនួន ៦០១ទំព័រ។ សៀវភៅនេះបានបញ្ចេញនូវរឿង សម្ងាត់ប្រមាណ ៧០ទៅ៨០ភាគរយដែលមនុស្សភាគច្រើនមិនបានដឹងដែលខ្ញុំយល់ថាចាំបាច់ត្រូវបញ្ចេញឱ្យដឹងនាពេលនេះ។ ខ្ញុំកំពុងឱ្យបោះពុម្ភចំនួន៥ម៉ឺនច្បាប់ និងចាត់ចែងឱ្យមានការបកប្រែជាភាសាអង់គ្លេស ដើម្បីឱ្យមិត្តភ័ក្របរទេសបានផងដែរ។ ជូនភ្ជាប់ជាមួយនូវរូបភាពសៀវភៅ៕ ”