សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត គ្រោងទៅចូលរួមពិធីបុណ្យភ្ជុំបិណ្ឌនៅវត្តវាំងចាស់

ដោយ៖ យូ វីរៈ | ថ្ងៃពុធ ទី១៦ ខែកញ្ញា ឆ្នាំ២០២០ |

1,465

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន គ្រោងនឹងទៅចូលរួមពិធីបុណ្យភ្ជុំបិណ្ឌធំ នៅវត្តវាំងចាស់ ខេត្តកំពង់ស្ពឺ។ នេះបើយោងតាមហ្វេសប៊ុកផ្លូវរបស់សម្ដេចតេជោបានបង្ហោះនៅថ្ងៃទី១៦ ខែកញ្ញា ឆ្នាំ២០២០នេះ។

សម្ដេចតេជោបានសរសេរថា ដោយសារប្រទេសយើងមានសុខសន្តិភាពពេញលេញ ទើបយើងមានឱកាសប្រារព្ធពិធីបុណ្យតូច ធំ ជាច្រើនដោយគ្មានការភ័យខ្លាច។ សម្ដេចតេជោបានបន្តថា សម្ដេចសូមចូលរួមកាន់បិណ្ឌជាមួយបងប្អូនជនរួមជាតិនៅទូទាំងប្រទេស។

សម្ដេចតេជោ ហ៊ុន សែន បានអំពាវនាវដល់បងប្អូនប្រជាពលរដ្ឋមានការប្រុងប្រយ័ត្នខ្ពស់ចំពោះអគ្គិភ័យ ដែលអាចបណ្ដាលមកពីការដុតធូប ទៀន នៅតាមទីកន្លែងសក្ការៈបូជាផ្សេងៗ និងសូមឲ្យយកចិត្តទុកដាក់ថែរក្សាសុខភាព ការពារការឆ្លងជំងឺកូវីដ១៩ ដោយត្រូវឧស្សាហ៍ដុសសម្អាតលាងដៃជាមួយសាប៊ូ ទឹកអាល់កុល ឬចឹលសម្លាប់មេរោគអោយបានជាប្រចាំ។

សម្ដេចតេជោ បានអំពាវនាវផងដែរដល់ អាជ្ញាធរនៅតាមបណ្តាខេត្តទាំងអស់ ជួយសម្រួលចរាចរណ៍ និងសណ្តាប់ធ្នាប់សាធារណៈអោយបានល្អដើម្បីបង្កលក្ខណៈកាន់តែងាយស្រួលដល់ប្រជាពលរដ្ឋ និងទេសចរបានចូលរួមប្រារព្ធពិធីបុណ្យភ្ជុំបិណ្ឌ៕